Hólmar Örn og Arnór Ingvi komust ekki í riðlakeppni Evrópudeildarinnar

Runólfur Trausti Þórhallsson skrifar 1. október 2020 19:05

Hólmar Örn (t.v.) var í byrjunarliði Rosenborg er liðið tapaði á heimavelli fyrir PSV. Vísir/Getty

Íslensku landsliðsmennirnir Hólmar Örn Eyjólfsson og Arnór Ingvi Traustason eru úr leik í forkeppni Evrópudeildarinnar í knattspyrnu. Var þetta síðasta umferð forkeppninnar en sigurvegarar kvöldsins fara í riðlakeppni Evrópudeildarinnar.

Hólmar Örn var í byrjunarliði Rosenborg sem fékk hollenska stórliðið PSV í heimsókn á Lerkendal-vellinum í Þrándheimi. Hólmar Örn gat þó ekki komið í veg fyrir 0-2 tap heimamanna í dag.

Eran Zahavi kom PSV um miðbik fyrri hálfleiks og hann lagði svo upp síðara mark liðsins. Það skoraði Cody Gakpo.

Rosenborg lagði Breiðablik á leið sinni í umspili en Blikar töpuðu 4-2 á þessum sama velli fyrr í sumar.

Arnór Ingvi hóf leik Malmö gegn Granada á varamannabekknum. Hann kom inn á er tuttugu mínútur voru eftir. Staðan var þá 2-1 Granda í vil en leiknum lauk með 3-1 sigri gestanna.

Mikill hiti var í leiknum undir lok leiks en gestirnir frá Spáni fengu þrjú gul spjöld í uppbótartíma.

Jo Inge Berget skoraði mark Malmö í leiknum. Liðið getur nú einbeitt sér eingöngu að sænsku deildinni þar sem það trónir á toppnum er átta umferðir eru eftir.

Fótbolti Evrópudeild UEFA

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.