Erlent

Lögregla skaut mann til bana á Þelamörk

Kristín Ólafsdóttir skrifar
Maðurinn var skotinn við Bolkesjø á Þelamörk í Noregi.
Maðurinn var skotinn við Bolkesjø á Þelamörk í Noregi. Vísir/getty

Lögregla á Þelamörk í Noregi skaut mann á fertugsaldri til bana við Bolkesjø síðdegis í dag. Félagar mannsins sem vitjuðu hans í dag segja að hann hafi komið á móti þeim með öxi á lofti.

Lögreglu var tilkynnt um manninn á fjórða tímanum. Fram kemur í yfirlýsingu frá lögreglu vegna málsins að maðurinn hafi borið sig undarlega og sýnt af sér ógnandi tilburði við annað fólk á staðnum. Lögreglumenn hafi þurft að grípa til vopna eftir samskipti við manninn og að endingu hleypt af nokkrum skotum.

Maðurinn var loks úrskurðaður látinn eftir að endurlífgunartilraunir á vettvangi báru ekki árangur. Aðstandendum hans hefur verið gert viðvart. Rannsóknarlögreglumenn eru nú að störfum á vettvangi. 

Fram kemur í frétt norska dagblaðsins VG að tveir samstarfsmenn mannsins hafi haft áhyggjur af honum og vitjað hans í dag. Maðurinn hafi ekki viljað hleypa þeim inn og þeir því reynt að komast inn um bakdyr. Þar hafi maðurinn mætt þeim með öxi á lofti og þeir í kjölfarið hringt á lögregluna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×