Innlent

Mótmæltu brottvísun egypsku fjölskyldunnar: „Áslaug Arna, martröð barna“

Kolbeinn Tumi Daðason skrifar
Sema Erla Serdar afhendir dómsmálaráðherra undirskriftirnar á tröppum Ráðherrabústaðarins.
Sema Erla Serdar afhendir dómsmálaráðherra undirskriftirnar á tröppum Ráðherrabústaðarins. Vísir/Vilhelm

Nokkur fjöldi fólks kom saman við Ráðherrabústaðinn í Tjarnargötu klukkan tíu til að mótmæla fyrirhugaðri brottvísun egypskra hjóna og fjögurra barna þeirra aftur til heimalandsins.

Fjölskyldan, foreldrar og fjögur börn, hefur dvalið hér á landi í tvö ár og berst nú fyrir því að fá pólitískt hæli. Fjölskyldufaðirinn tók þátt í pólitísku starfi í Egyptalandi gegn ríkjandi stjórnvöldum. 

Foreldrarnir óttast að þeir verði handteknir við komuna til Egyptalands og börnin tekin af þeim. Þeim verður að óbreyttu vísað úr landi á morgun, miðvikudag.

Áslaugu Örnu Sigurbjörnsdóttur dómsmálaráðherra voru afhentar undirskriftir þar sem skorað er á stjórnvöld að veita fjölskyldunni hæli hér á landi.

Mótmælin fóru fram við Ráðherrabústaðinn þar sem reglulegur fundur ríkisstjórnarinnar fer fram á þriðjudögum.

Fulltrúar lögreglu voru mættir í Tjarnargötuna.Vísir/Vilhelm

Sema Erla Serdar, stofnandi Solaris sem eru hjálparsamtök fyrir hælisleitendur og flóttafólk á Íslandi, segir í samtali við fréttastofu að rúmlega tólf þúsund undirskriftir hefðu verið afhentar til að sýna stuðning í verki.

„Stuðning við þau börn sem búa nú við þann ótta að vera vísað úr landi,“ segir Sema.

Fjallað um mál fjölskyldunnar í fréttum Stöðvar 2 í gær og rætt við móður og börn.

Á annan tug manns hrópa og kalla við Ráðherrabústaðinn. Má meðal annars heyra „Áslaug Arna, martröð barna“ og „Kata Kata er gott að hata“. Þá spyrja mótmælendur hvernig ráðamenn sofi á nóttunni.

„Það er ekkert mál að bjarga þessum börnum ef það er vilji til þess,“ segir Sema Erla. Það megi gera með einu pennastriki. 

Börn séu fyrst og fremst börn og þessi fjögur hafi búið hér á landi í rúmlega tvö ár. Það sé á við eilífð þegar um flóttabörn sé að ræða. 

„Hér búa þau og hér eiga þau að vera.“

Ingibjörg Ottesen, mótmælandi á áttræðisaldri, segist ætla að gera eitthvað komi ekki yfirlýsing frá ráðamönnum í hádeginu þess efnis að egypsku börnin fái að vera áfram á Íslandi.

Áslaug Arna Sigurbjörnsdóttir dómsmálaráðherra segir að athugun hafi leitt í ljós að ekki væri við kerfið að sakast í máli fjölskyldunnar sem vísa á úr landi á morgun. Þá hafi ekki verið bent á einstök atriði í kerfinu sem þyrfti að breyta til þess að fjölskyldan fái hæli hér á landi. 

Fundað verður um mál fjölskyldunnar í allsherjar- og menntamálanefnd Alþingis í dag og stendur fundurinn yfir.

Kemur ekki til greina að breyta reglugerðum

Dómsmálaráðherra hefur sagt að ekki komi til greina að breyta reglugerðum um málsmeðferðartíma vegna máls fjölskyldunnar. Ráðherra sagði í útvarpsþættinum Bítinu á Bylgjunni í morgun að hún hefði heyrt af málinu í fjölmiðlum eins og aðrir í landinu. Hún hefði óskað eftir svörum við því af hverju fjölskyldan hefði dvalið jafnlengi á landinu og raun bar vitni.

„Sú könnun mín leiddi í ljós að það er ekki við kerfið að sakast í þessu einstaka máli.“

Málið hefur vakið hörð viðbrögð meðal almennings en mörgum þykir ómannúðlegt að vísa fjölskyldunni úr landi, einkum í ljósi þess að um ung börn er að ræða sem fest hafa rætur í íslensku samfélagi. Innt eftir því hvort hún skilji slík viðbrögð, að fólk vilji ekki hafa kerfið á þennan veg, sagði Áslaug Arna að hún skildi „að sjálfsögðu“ viðbrögðin.

„Við erum öll mannleg og finnum öll fyrir samúð með þessu fólki og skiljum af hverju það leitar hingað. Þess vegna erum við alltaf að hugsa hvernig við getum gert kerfið betra.“ Nauðsynlegt væri að stytta málsmeðferðartíma hjá börnum en einnig þyrfti að horfa á kerfið í heild. Þannig benti Áslaug Arna á að aldrei hefðu fleiri fengið vernd hér á landi og í fyrra, eða 500 manns á árinu.

Innt eftir því hvort hún gæti breytt stefnu málsins og ákveðið að leyfa fjölskyldunni að vera áfram á landinu svaraði ráðherra neitandi.

„Nei, ráðherra tekur ekki slíkar ákvarðanir og þá þarf að breyta almennum reglum og lögum. Það hefur ekki verið bent á einstök atriði í kerfinu sem þyrfti að breyta til þess að þessi fjölskylda myndi falla þar undir.“


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×