Golf

Dustin Johnson tveimur milljörðum ríkari eftir gærdaginn

Óskar Ófeigur Jónsson skrifar
Dustin Johnson brosti auðvitað út að eyrum eftir þennan frábæra sigur.
Dustin Johnson brosti auðvitað út að eyrum eftir þennan frábæra sigur. Getty/Sam Greenwood

Bandaríski kylfingurinn Dustin Johnson er svo sannarlega á toppi heimsins þessa dagana. Það er ekki nóg með að vera í efsta sæti heimslistans þá sýndi hann af hverju á Tour Championship sem lauk í gær.

Dustin Johnson tryggði sér sigur á Tour Championship í gær og er þar með handhafi FedEx bikarsins í ár.

Dustin Johnson var með fimm högga forskot fyrir lokadaginn og endaði á því að vinna mótið með þremur höggum. Í öðru sæti voru síðan landar hans Justin Thomas og Xander Schauffele.

Þessi 36 ára gamli kylfingur var búinn að leggja grunninn að sigrinum með góðri frammistöðu í úrslitakeppninni en hann byrjaði mótið á tíu höggum undir pari. Dustin Johnson gaf ekkert eftir og endaði á 21 höggi undir pari.

Dustin Johnson þarf ekki að kvarta mikið yfir verðlaunafénu. Hann fær fimmtán milljónir Bandaríkjadala fyrir sigurinn eða meira en tvo milljarða íslenskra króna.

Það var einstakt að fylgjast með Dustin Johnson í úrslitakeppninni í bandarísku mótaröðinni í ár en í fjórum síðustu mótunum, eins og sjá má hér fyrir ofan, þá vann hann tvisvar og varð tvisvar í öðru sæti.

Þetta er í fyrsta sinn sem Dustin Johnson vinnur FedEx bikarinn en hann klúðraði góðri stöðu fyrir fjórum árum.

„Þetta er erfiður golfvöllur þannig að maður er aldrei öruggur með neitt forskot. Ég vissi því að ég yrði að koma út og spila mjög vel,“ sagði Dustin Johnson.

„Ég vildi verða FedEx meistari á ferlinum og stefndi á það. Ég er mjög stoltur af því hvernig ég spilaði ekki síst í undanförnum fjórum mótum,“ sagði Dustin Johnson sem fór á kostum í úrslitakeppninni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.