Jakob Örn Sigurðarson og Helgi Már Magnússon munu taka slaginn með Íslandsmeisturum KR í vetur. Mike DiNunno verður hins vegar ekki með KR í titilvörninni á næsta tímabili.
Jafnaldrarnir Jakob og Helgi (fæddir 1982) hafa skrifað undir eins árs samning við KR líkt og hinn ungi Veigar Áki Hlynsson. Þá sömdu þeir Eyjólfur Ásberg Halldórsson og Þorvaldur Orri Árnason til tveggja ára við KR. Þetta kemur fram á heimasíðu körfuknattleiksdeildar KR.
Jakob sneri aftur til KR fyrir síðasta tímabil eftir áratug í atvinnumennsku í Svíþjóð. Hann skoraði 12,6 stig og gaf 2,8 stoðsendingar að meðaltali í leik í Domino's deildinni á síðasta tímabili.
„Það er mjög ánægjulegt að Jakob og Helgi ætli að taka eitt ár í viðbót. Það var líka ánægjulegt að skrifa undir samninga við ungu strákana okkar sem munu taka við keflinu af þeim sem eru að stíga sín síðustu spor,“ sagði Böðvar Guðjónsson, formaður körfuknattleiksdeildar KR, í samtali við Vísi í dag.
DiNunno, sem samdi við KR í vor, verður ekki áfram í Vesturbænum en samningi hans var rift. Samkvæmt umboðsmanni DiNunnos, Manuel Capicchiono, hefur hann fundið sér nýtt félag í Evrópu.
DiNunno, sem er Bandaríkjamaður með ítalskt vegabréf, lék með KR seinni hluta tímabilsins 2018-19 og átti stóran þátt í því að liðið varð Íslandsmeistari. Hann átti að koma aftur til KR í mars síðastliðnum og klára síðasta tímabil með liðinu en ekkert varð af því vegna meiðsla og svo var tímabilið blásið af vegna kórónuveirufaraldursins. DiNunno samdi við svo KR í vor en nú er ljóst að hann leikur ekki með liðinu í vetur.
Aðspurður hvort KR væri búið að semja við bandarískan leikmann og/eða Bosman-leikmann vildi Böðvar lítið segja.
„Nei, það er ekkert komið ennþá. Menn eru bara að undirbúa sig fyrir næsta tímabil. Það er enginn útlendingur kominn til landsins. Við erum bara að skoða markaðinn og sjá hvað er í boði“ sagði Böðvar.
Darri Freyr Atlason er nýr þjálfari KR en hann tók við af Inga Þór Steinþórssyni sem var sagt upp í vor.
