Ingi um Brynjar: Ein­hver tími í að hann verði með

KR vann mikilvægan sigur á Val í Dominos-deild karla í kvöld, 90-81. Leikið var í Origo-höllinni á Hlíðarenda. Sigurinn tryggir KR 4. sæti í deildinni og á liðið enn möguleika á að ná 3. sætinu.

„Í raun og veru var ég ekkert rosalega ánægður með spilamennskuna svona í heild. Við vorum mjög kaflaskiptir, áttum kafla sem dugðu til að ná einhverri forystu en svo fannst mér við slaka of mikið á. Áður en leikurinn byrjaði fannst mér andrúmsloftið vera þannig að allir voru einhvernveginn sultuslakir, bæði lið, enginn í salnum og við duttum í að vera ánægðir með að vera komnir 9-10 stigum yfir,“ sagði Ingi Þór Steinþórsson, þjálfari KR, í viðtali eftir leik.

„Þeir náðu alltaf að minnka muninn jafnt og þétt með körfum sem mér fannst óþarfi fyrir okkur, það var kannski ekki nógu mikill fókus. Við vorum að fá gott framlag sóknarlega séð, Jakob var frábær og Jón og það voru nokkrir ágætir en mér fannst liðið í heild geta gert betur.“

Í dag bárust þau tíðindi að mörgum körfuboltadeildum um allan heim hafi verið frestað vegna Kórónuveirunnar. Ingi telur það mögulega hafa sett mark sitt á leikinn í dag.

„Ég held að leikmenn hafi alveg verið með það í kollinum að þeir áttu allt eins von á því að þessum leik yrði frestað eða flautaður af. Fókusinn kannski ekki á réttum stað en við gerðum nóg til þess að vinna þetta og ég er mjög ánægður með að við náðum að tryggja okkur fjórða sætið með sigri hérna í dag og setjum pressu á Tindastól í þriðja sætinu. Það er Þór Akureyri eftir viku og við þurfum að vera mjög einbeittir til að klára það, við töpuðum fyrir þeim síðast,“ sagði Ingi.

KR-liðið hefur núna unnið fjóra leiki í röð og á möguleika á að enda tímabilið á fimmta sigrinum í röð í næstu viku. Ingi segir mikilvægt að enda deildartímabilið á góðum nótum.

„Það er mjög mikilvægt að binda saman sigra, við erum búnir að ná mjög góðum sigrum á móti sterkum liðum en höfum ekki verið að gera vel á móti liðum á botni deildarinnar. Það er áskorun fyrir okkur að mæta gíraðir næsta fimmtudag og nota vikuna vel og klára deildarkeppnina með stæl. Ég trúi því að við fáum þriðja sætið.“

Eins og áður sagði hefur Kórónuveiran haft mikil áhrif á körfuboltaheiminn í dag og umræður uppi um hvort eða hvenær þurfi að gera hlé á keppni í íslenska körfuboltanum. Ingi lætur það ekki á sig fá.

„Það er mikið af sérfræðingum sem vita þetta allt saman en við þurfum bara að hlusta á þá sem að stjórna þessu og ég veit að íþróttahreyfingin er í góðu samstarfi og munu taka hárrétta ákvörðun sama hver hún verður. Á meðan við vitum að það er leikur næsta fimmtudag þá erum við á fullu að undirbúa okkur fyrir það.‘‘

,,Um leið og við vitum að það er ekki leikur þurfum við að breyta aðeins prógramminu og fara eftir því sem er gert en við getum ekki farið að lifa í einhverri óvissu og setja allt í loft upp áður en það er búið að ákveða neitt. Okkar stefna er bara að jafna okkur eftir þennan leik og keyra okkur upp fyrir Þór Ak. í næstu umferð,“ sagði Ingi um ástandið í dag.

Ingi var einnig spurður út í mál Brynjars Þórs sem hefur ekki spilað með KR í síðustu tveimur leikjum, en hann gaf út yfirlýsingu fyrir viku um að hann myndi ekki taka þátt vegna smithættu.

„Hann mun koma til baka en hann var ekki með í dag og það er einhver tími í það en við bíðum spenntir eftir að fá hann til baka, hann er mikilvægur hlekkur í okkar liði og á eftir að styrkja okkur eins og hann er búinn að vera að spila eftir áramót. Búinn að vera frábær eftir áramót og hann kemur sterkur inn úr þessu verkefni sem hann er í,“ sagði Ingi að lokum.