Lífið

Daði hefur ekki of miklar á­hyggjur af á­hrifum kórónu­veirunnar á Euro­vision

Sylvía Hall skrifar
Daði Freyr og Gagnamagnið ætla sér alla leið.
Daði Freyr og Gagnamagnið ætla sér alla leið.
Daði Freyr Pétursson, sem fer út fyrir Íslands hönd í Eurovision í ár, segist taka þátttökunni mjög alvarlega. Hann vilji að Gagnamagninu vegni vel í keppninni og að atriðið muni ganga upp. Eurovision sé þó fyrst og fremst skemmtun, bæði fyrir áhorfendur og þau sem taka þátt.



Þetta kemur fram í viðtali Metro við Daða Frey. Þar er rætt um Netflix samsæriskenningarnar, möguleg áhrif kórónuveirunnar á keppnina og það að þurfa að vera í burtu frá dóttur sinni á meðan keppnin fer fram.



„Ef það gerist núna, þá þýðir það að við enduðum í fyrsta sæti í Eurovision, ég myndi upplifa það sem ákveðinn sigur,“ segir Daði um þann möguleika að keppninni yrði frestað. Hann segist þó ekki hafa of miklar áhyggjur.



„Ég myndi vilja koma fram á sviðinu. Ég hef séð hvernig sviðið verður, og það er risastórt. Ég er mjög spenntur að færa [atriðið] á stóra sviðið. En það er ekki heimsendir – vonandi, kannski er það heimsendir. Vona ekki.“

Vonar að Íslendingar geti fagnað á fimmtudeginum 

Þrátt fyrir spár um gott gengi Daða og Gagnamagnsins í keppninni er Daði nokkuð rólegur. Sigurinn sé alls ekki í höfn og þau séu ekki mikið að pæla í tölfræði veðbanka.



„Ég held við séum ekki endilega að fara að vinna, við erum ekki að pæla of mikið í því. Við ætlum bara að fara og koma fram og sjá hvað gerist. Vonandi komumst við að minnsta kosti í úrslit, svo Ísland geti haldið gott partý.“



Ísland kemur fram á seinna undanúrslitakvöldi keppninnar þann 14. maí. Það er óhætt að segja að Íslendingar fari vongóðir inn í keppnina í ár, enda hefur Ísland vermt fyrsta og annað sæti veðbanka til skiptis undanfarnar vikur.



Sjá einnig: Daða spáð sigri í Eurovision samkvæmt veðbönkum



Þá hefur lagið vakið mikla athygli á samfélagsmiðlum á borð við Twitter. Á meðal þeirra sem vöktu athygli á laginu er leikarinn Russell Crowe, en hann deildi því með fylgjendum sínum sem eru hátt í þrjár milljónir.



„Það hefur verið frekar klikkað. Það byrjaði fyrir um það bil tveimur vikum þegar Internetið uppgötvaði lagið. Síðan við unnum hefur það nokkurn veginn verið stanslaust,“ segir Daði um athyglina sem lagið hefur fengið.

Daði Freyr og Gagnamagnið flytja lagið Think about things í Rotterdam 14.maí.Skjáskot

Samsæriskenningarnar fyrst og fremst fyndnar

Nokkrum dögum eftir sigur Gagnamagnsins hér heima birti Twitter-notandinn @jrawson skjal sem átti að sýna fram á fyrir fram ákveðna tímalínu Netflix til þess að tryggja sigur Daða í lokakeppninni. Skjalið var þó að öllum líkindum grín höfundar, en útibú Netflix í Bretlandi og Írlandi deildi tístinu áfram.



Sjá einnig: Netflix svarar samsæriskenningum um Daða Frey



Skjalið er merkt Netflix og kvikmyndinni Eurovision og kemur fram þar að þetta sé markaðsáætlun fyrir myndina. Þá virðist stimpill í hægra horni sem á stendur að skjalið sé trúnaðargögn. Daði segist fyrst hafa verið ósáttur með grínið en með tímanum hafi það bara orðið fyndið.



„Þegar ég sá það fyrst fannst mér það skrítið og var ekki alveg sáttur með það, því mér fannst eins og það væri að draga úr því sem við vorum að gera. Það gæti ekki verið að fólki líkaði einfaldlega lagið og atriðið og væri að bregðast við því,“ segir Daði.



„Síðan þá hefur þetta haldið áfram og er bara frábær athygli fyrir okkur. Það er meira fyndið en nokkuð annað. Ég hvet fólk til þess að halda samsæriskenningunni gangandi.“



Hljómsveitin hefur nú hafið undirbúning fyrir lokakeppnina og er hann í fullum gangi. Lagið sjálft er samið um tæplega árs gamla dóttur Daða og Árnýjar eiginkonu hans en hún fer þó ekki með þeim til Rotterdam.



„Það hefur verið erfiðara fyrir eiginkonu mína en mig, því ég hef haft lengri tíma til að aðlagast. Ég hef upplifað vikur þar sem ég hef verið í burtu að vinna, svo þetta hefur verið erfiðara fyrir hana. Dóttir okkar verður á Íslandi þegar við förum til Rotterdam svo hún er farin að vera svolítið stressuð yfir því.“


Tengdar fréttir

Daði ætlar sér ekki að breyta atriðinu

"Núna er bara að fara af stað svaka prógram,“ segir Daði Freyr Pétursson í þættinum Reykjavík síðdegis á Bylgjunni í dag. Daði og Gagnamagnið unnið Söngvakeppnina á laugardaginn með laginu Think about things sem verður framlag Íslands í Eurovision í Rotterdam í maí.

Gagnamagnsgarn til heiðurs Daða og Gagnamagninu

Sérstakt Gagnamagnsgarn er nú komið á markað úr íslenskri ull til heiðurs Daða Frey og Gagnamagninu vegna söngvakeppninnar í Rotterdam í Hollandi í vor en þar mun Daði og hans fólk keppa fyrir hönd Íslands. Garnið sem er af íslensku sauðkindinni er litað til að fá rétta græna litinn fram.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.