Handbolti

Rut með Esbjerg í 8-liða úrslit Meistaradeildar | Súrrealískt, segir þjálfarinn

Sindri Sverrisson skrifar
Rut Jónsdóttir varð danskur meistari með Esbjerg í fyrra.
Rut Jónsdóttir varð danskur meistari með Esbjerg í fyrra. vísir/bára

„Það liggur við að ég segi að við höfum spilað yfir getu, því við höfum náð algjöru hámarki stiga sem við áttum möguleika á. Þetta er eiginlega súrrealískt,“ sagði þjálfari Rutar Jónsdóttur hjá danska handboltafélaginu Esbjerg, Jesper Jensen, í dag.

Esbjerg tryggði sér í dag sæti í 8-liða úrslitum Meistaradeildar Evrópu í handbolta þrátt fyrir að enn séu tvær umferðir eftir af riðlakeppninni. Dönsku meistararnir unnu Noregsmeistara Vipers Kristiansand, 35-30, og eru því jafnir Frakklandsmeisturum Metz með 11 stig á toppi 1. riðils. Sigur Esbjerg í dag þýðir jafnframt að Metz er einnig komið í 8-liða úrslit.

Stórlið Rostov Don frá Rússlandi og CSM Búkarest frá Rúmeníu eru í 3.-4. sæti með 9 stig en nú er ljóst að Vipers Kristiansand, sem er í 5. sæti, getur ekki náð efstu tveimur liðunum. Fjögur efstu liðin komast í 8-liða úrslitin.

Rut var ekki á meðal markaskorara Esbjerg í dag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.