Viðskipti innlent

For­stjóri Lands­virkjunar segir raf­orku­verð ekki aðal­vanda­mál Isal

Heimir Már Pétursson skrifar
Hörður Arnarson, forstjóri Landsvirkjunar, telur samninginn sanngjarnan við ISAL um kaup á raforku. Hann hefur verið í gildi frá árinu 2010.
Hörður Arnarson, forstjóri Landsvirkjunar, telur samninginn sanngjarnan við ISAL um kaup á raforku. Hann hefur verið í gildi frá árinu 2010. Vísir/Vilhelm

Forstjóri Landsvirkjunar segir verð á raforku til álversins í Straumsvík aðeins lítinn hluta af vandamálum fyrirtækisins. Raforkuverðið sé sanngjarnt en meginvandamálið sé lækkun á afurðaverði fyrirtækisins.

Mikið vatn hefur runnið til sjávar þá hálfu öld sem liðin er frá því Álverið í Straumsvík hóf starfsemi sína. Í dag er það minnsta álverið af nokkrum í landinu en verður þó enn að teljast mikilvægt fyrir þá 370 starfsmenn sem þar vinna og aðra hundrað og þrjátíu sem vinna þar daglega, fyrir utan hagsmuni margs konar þjónustufyrirtækja og Hafnarfjarðarbæjar.

Hörður Arnarson segir verð raforku ekki vera aðalvandamál Isal. „Það er rétt að þeir eru að borga ágætis raforkuverð. En við teljum að raforkusamningurinn sé mjög sanngjarn.“

Var ekki talað um það á sínum tíma þegar endursamið var við Isal árið 2010 að önnur álver myndu fara inn í svipaða hugmyndafræði og er á bakvið þann samning?

„Jú, þegar við fórum í þessa vegferð 2010 var það markmið okkar að semja um svipað raforkuverð á Íslandi og er samið um annars staðar. Markmiðið var síðan að gera það líka við aðra viðskiptavini,“ segir Hörður.  Engu að síður hafi verið ákveðið að setjast nú niður með Rio Tinto  til að fara yfir stöðuna. 

„Það er mikilvægt að hafa í huga að raforkuverðið er bara lítill hluti af þessu máli. Stærsta vandamál álversins er lágt afurðaverð og lágt verð á þeim afurðum sem þeir framleiða. Síðan hafa verið rekstrarvandræði hjá álverinu. Það eru stóru vandræðin að mínu mati. Þannig að mér finnst það í raun ekki rétt að einblína eingöngu á raforkuverðið,“ segir forstjóri Landsvirkjunar.

Öll málmfyrirtæki í heiminum eigi í erfiðleikum vegna samdráttar í efnahagsmálum.  En vonandi leysist úr þeirri stöðu. „Þetta er mjög mikilvægur viðskiptavinur fyrir okkur. Þetta er líka okkar elsti viðskiptavinur. Við vonum svo sannarlega að þeir hafi rekstrargrundvöll hér áfram,“ segir Hörður.

Hjá Landsvirkjun eru til áform um virkjanaframkvæmdir og því spurning hvort stefna fyrirtækisins myndi breytast ef Isal hætti starfsemi?

„Þeir eru náttúrlega með langtíma samning við okkur sem gildir til 2036 ef ég man rétt. Við munum bara vona að það samningssamband haldi.“

En það er vissulega verið að knýja dyra hjá ykkur af öðrum?

„Já en það er hins vegar akkúrat núna í þessari efnahagslægð sem er í heiminu tiltölulega lítil eftirspurn,“ segir Hörður Arnarson.

Álverið í Straumsvík hóf starfsemi sumarið 1969 en ekki 1967 eins og missagt var í myndbandinu með þessari frétt.

Tengd skjöl


Tengdar fréttir

Segir að samningurinn við álverið sé sanngjarn

Forstjóri Landsvirkjunar segir að raforkusamningur við ISAL - álverið í Straumsvík sé sanngjarn fyrir báða aðila. Fleiri þættir en raforkuverðið hafi áhrif á stöðu álversins.




Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
LEQ
0,59
1
1.288

Mesta lækkun dagsins


Félag
Br.%
Fjöldi
Velta*
ICEAIR
-6,56
15
6.123
REGINN
-3,59
20
47.585
EIK
-3,31
8
62.252
VIS
-3,22
7
89.006
SJOVA
-2,66
11
32.075
Velkomin á Vísi. Þessi vefur notar vafrakökur. Sjá nánar.