Bankamaður sem tengdist meintum fjársvikum ríkustu konu Afríku fannst látinn

Karlmaður á fimmtugsaldri sem sá um reikning angólska olíufyrirtækisins Sonangol fyrir portúgalskan banka fannst látinn í Lissabon í gær. Angólskir saksóknarar nefndu hann sem sakborning í rannsókn á meiriháttar fjárdráttar- og peningaþvættismáli gegn Isabel dos Santos, ríkustu konu Afríku.

Vísbendingar um að dos Santos hefði sankað að sér milljörðum dollara í krafti stöðu sinnar í heimalandi sínu Angóla komu fram í rannsókn fjölmiðla sem byggðist á umfangsmiklum gagnaleka um síðustu helgi. Dos Santos, sem er dóttir José Eduardo dos Santo, fyrrverandi forseta Angóla, virðist hafa nýtt sér embætti sem hún fékk í gegnum föður sinn til að draga að sér ógrynni fjár.

Dos Santos, sem hafnar ásökunum um spillingu, keypti meðal annars eignarhlut í orkufyrirtækinu Galp af angólska ríkisfyrirtækinu Sonangol þegar hún var formaður stjórnar þess. Þurfti dos Santos aðeins að greiða 15% af kaupverði hlutanna en afganginum var breytt í lán með lágum vöxtum sem hún hafði ellefu ár til að greiða upp.

Saksóknarar í Angóla krefjast þess að dos Santos endurgreiði um milljarð dollara, jafnvirði um 125 milljarða íslenskra króna. Sakamálarannsókn fer nú fram vegna ásakanna á hendur fyrrverandi forsetadótturinni.

Breska ríkisútvarpið BBC segir nú að Nuno Ribeiro da Cunha, 45 ára gamall starfsmaður portúgalska bankans EuroBic, sem sá um reikning Sonangol hafi fundist látinn í íbúð sinni í gær. Portúgalskir fjölmiðlar hafi eftir heimildum innan lögreglunnar að allt benti til þess að da Cunha hafi svipt sig lífi. Hann hafi gert tilraun þess fyrr í þessum mánuði og hann hafi þjáðst af þunglyndi.

Eurobic tilkynnti í gær að hann ætlaði að hætta viðskiptum við dos Santos sem er talin stærsti hluthafi bankans í gegnum tvö félög í hennar eigu. Hún ætli ennfremur að selja hlutina í bankanum. Í framhaldinu ætlar bankinn að rannsaka millifærslur á tugum milljóna dollara sem dos Santos lét fara fram. New York Times greindi frá því um helgina að dos Santos hefði tæmt fé af reikningum Sonangol hjá EuroBic.

Fjármálaeftirlit Portúgal er byrjað að rannsaka ýmis fyrirtæki þar í landi sem dos Santos á hluti í, að sögn Reuters-fréttastofunnar. Angóla er fyrrum portúgölsk nýlenda. Á meðal fyrirtækjanna sem eru til skoðunar eru Galp, fjarskiptafyrirtækið Nos og ónefnd endurskoðunarfyrirtæki.

Dos Santos er búsett í Bretlandi og er talin auðugasta kona Afríku. Eignir hennar eru metnar á um tvo milljarða dollara, jafnvirði um 250 milljarða íslenskra króna.