Golf

Ólafía Þórunn getur orðið Íslandsmeistari á vellinum þar sem hún byrjaði í golfi

Óskar Ófeigur Jónsson skrifar
Ólafía Þórunn Kristinsdóttir hefur keppt á Íslandi í sumar vegna kórónuveirufaraldursins.
Ólafía Þórunn Kristinsdóttir hefur keppt á Íslandi í sumar vegna kórónuveirufaraldursins. Myndir/seth/golf.is

Ólafía Þórunn Kristinsdóttir hefur í dag keppni á sínu fyrsta Íslandsmóti í golfi í fjögur ár eða síðan að hún tryggði sig inn á bandarísku atvinnumótaröðina í golfi.

Ólafía Þórunn Kristinsdóttir hefur leik klukkan 15.50 og er í mjög öflugum ráshópi með Íslandsmeistara tveggja síðustu ára, Guðrúnu Brá Björgvinsdóttur og svo Ragnhildi Kristinsdóttur sem hefur verið lengi í hópi bestu kvenkylfinga hér á landi.

Ólafía Þórunn Kristinsdóttir keppti síðast á Íslandsmótinu árið 2016 þegar það fór fram á Jaðarsvelli á Akureyri. Hún varð þá Íslandsmeistari í þriðja sinn á ferlinum og sett mótsmet með því að spila hringina fjóra á ellefu höggum undir pari.

Íslandsmótið í golfi fer að þessu sinni fram á Hlíðarvelli í Mosfellsbæ og þó að Ólafía Þórunn sé í Golfklúbbi Reykjavíkur þá á hún sterkt tengsl við þennan völl.

„Hér í Mosfellsbæ fékk ég góð hvatningu á sínum tíma til að halda áfram í golfi. Ég hlakka því til að spila á Íslandsmótinu á þessum velli þar sem að golfferill minn byrjaði á sínum tíma,“ segir Ólafía Þórunn Kristinsdóttir úr Golfklúbbi Reykjavíkur, í samtali við heimasíðu Golfsambands Íslands.

Ólafía Þórunn er eini íslenski kylfingurinn sem hefur náð alla leið inn á bandarísku LPGA mótaröðina og hún er til alls likleg á sínum gamla heimavelli á Íslandsmótinu í golfi 2020.

„Ég byrjaði í golfi hér hjá Golfklúbbnum Kili í Mosfellsbæ. Hér fékk ég góða hvatningu þegar ég var ekkert sérstaklega ánægð með árangurinn hjá mér. Keppnisskapið var til staðar á þeim tíma og það var ekkert gaman að vera ekki góð og ná árangri. Þriðjudagsmótaröð barna – og unglinga hafði góð áhrif á mig. Hér fékk ég mín fyrstu verðlaun í golfi og þau sem héldu utan um barna – og unglingastarfið gerðu allavega það rétta í stöðunnni hvað mig varðar. Ég hélt áfram eftir að hafa fengið verðlaun á þessum mótum,“ segir Ólafía Þórunn en hún hefur þrívegis sigrað á Íslandsmótinu í golfi, 2011, 2014 og 2016.

Ólafía Þórunn segir að lokum að það verði skemmtilegt verkefni að glíma við Hlíðavöll án þess að vera með aðstoðarmann líkt og hefur tíðkast í keppnisgolfinu.

„Vegna Covid-19 eru engir aðstoðarmenn leyfðir. Ég kvíði því ekki, þar sem ég hef alltaf tekið mínar ákvarðanir sjálf úti á velli, og ég er í það góðu líkamlegu ástandi að það verður ekkert mál að ýta kerrunni á undan sér. Vonandi verður veðrið bara skaplegt þannig að við getum notið þess að leika golf við þessar aðstæður,“ segir Ólafía Þórunn Kristinsdóttir.

Það má lesa allt viðtalið hér.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.