Ölvaður og virti ekki mörk einangrunar

Kjartan Kjartansson skrifar 1. ágúst 2020 07:20

Alls rötuðu 79 mál á borð lögreglunnar á höfuðborgarsvæðinu frá 17:00 í gærkvöldi til klukkan 5:00 í morgun. Vísir/Vilhelm

Maður sem átti að vera í einangrun á heimili sínu vegna Covid-19 var vistaður í fangageymslu lögreglunnar á höfuðborgarsvæðinu í nótt eftir að aðrir íbúar sögðust úrræðalausir yfir því að hann væri ölvaður og ætti erfitt með að virða mörk einangrunarinnar.

Í dagbók lögreglunnar eftir nóttina kemur fram að maðurinn hafi verið látinn renna af sér í fangageymslu. Hann var einn fjögurra sem gistu fangageymslur í borginni af ýmsum ástæðum í nótt.

Tilkynnt var um mann með hnífa á heimili sínu sem væri í annarlegu ástandi. Lögregla segir að maðurinn hafi átt við andleg vandamál að stríða. Honum hafi verið fengin „viðeigandi aðstoð“.

Tvö húsbrot voru framin. Annars vegar barst lögreglu tilkynning frá manni sem hefur hús í miðborginni til umráða. Hann kom að tveimur mönnum sem höfðu gert sig heimakomna í íbúðinni. Þeir verða kærðir fyrir húsbrot. Í Reykjavíkurhöfn tilkynnti eigandi báts að tveir hefðu komið sér fyrir í honum. Þeir verða einnig kærðir fyrir húsbrot.

Í Hafnarfirði var hjólreiðamaður sem datt harkalega fluttur til aðhlynningar á slysadeild.

Fjöldi hávaðakvartana barst lögreglunni í gærkvöldi og nótt. Þá bárust nokkrar kvartanir vegna flugeldasprenginga.

Lögreglumál Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.