304 blað­berum Póst­dreifingar sagt upp

Póstdreifing, sem er í eigu Torgs og Árvakurs, útgefenda Fréttablaðsins og Morgunblaðsins, hefur sagt upp öllum blaðberum sínum á höfuðborgarsvæðinu og Akureyri, alls 304 einstaklingum. Ríkisútvarpið greindi fyrst frá málinu en Kristín Björk Einarsdóttir framkvæmdastjóri Póstdreifingar staðfestir það í samtali við Vísi.

Blaðberarnir sjá um útburð á Fréttablaðinu og Morgunblaðinu, auk fleiri blaða og bæklinga. Uppsagnirnar taka gildi frá og með 1. ágúst, þ.e. á morgun, og eru blaðberarnir flestir með þriggja mánaða uppsagnarfrest.

Kristín segir í samtali við Ríkisútvarpið að flestir blaðberarnir verði ráðnir aftur með breyttu vinnufyrirkomulagi og að um endurskipulagningu sé að ræða. Haft verður samband við þá sem fá endurráðningu innan mánaðar. Þá gerir hún ekki ráð fyrir að röskun verði á starfsemi Póstdreifingar vegna þessa.