Erlent

Louvre lifnar við á nýjan leik

Atli Ísleifsson skrifar
Reynt verður að tryggja fjarlægð milli gesta á safninu eins og hægt er.
Reynt verður að tryggja fjarlægð milli gesta á safninu eins og hægt er. Getty

Listasafnið Louvre í París opnaði dyr sínar fyrir gestum á nýjan leik í morgun, fjórum mánuðum eftir að skellt var í lás vegna faraldurs kórónuveirunnar. Forsvarsmenn safnsins segjast eiga von á rólegu sumri, sér í lagi þar sem bandarísku ferðamönnum hefur verið meinað að ferðast til ríkja ESB.

Þrátt fyrir að safnið hafi verið opnað á ný eru enn svæði þar innandyra sem verða áfram lokuð. Svæðum þar sem erfitt gæti reynst að tryggja fjarlægð milli gesta verður lokað, en salir með vinsæl verk á borð við Monu Lisu og ýmsa fornmunum verða opin almenningi. Er áætlað að um þriðjungur safnsins verði áfram lokaður.

Til að draga úr smithættu á fjölmennustu stöðunum er búið að koma fyrir merkingum á gólfi sem ætlað er að tryggja fjarlægð milli fólks. Þá er búið að koma örvum fyrir á gólfinu til að tryggja flæði gesta.

Áætlað er að safnið hafi orðið af um 40 milljónum evra tekjum, rúmum sex milljörðum króna, vegna lokunarinnar.

Takmörkun ferðamanna hefur haft mikil áhrif á safnið en á síðasta ári komu um 70 prósent gesta erlendis frá. Gestir árið 2019 töldu alls um 9,6 milljónir manna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.