Tíska og hönnun

Studio 2020 á HönnunarMars: Hönnunarspjall eitt

Sylvía Rut Sigfúsdóttir skrifar
Settið hjá Studio 2020 á Hafnartorgi.
Settið hjá Studio 2020 á Hafnartorgi. Mynd/HönnunarMars

Hönnunarspjallið er liður í dagskrá Studio 2020 á HönnunarMars, sem er tilraunavettvangur á HönnunarMars 2020, og ætlað er að miðla efni hátíðarinnar á ýmsu formi á meðan á henni stendur og í kjölfarið.  Þættirnir eru þrír talsins og verða sýndir hér á Vísi klukkan þrjú í dag, á föstudag og laugardag. Hægt er að fylgjast með í beinni útsendingu í spilaranum hér fyrir neðan eftir að hún hefst.

Klippa: Hönnunar­spjall STU­DIO 2020 - Bergur, Greipur og Sara

Garðar Eyjólfsson og Hlín Helga Guðlaugsdóttir ræða við Berg Finnbogason sköpunarstjóri EVE online hjá CCP, Þóreyju Einarsdóttur, stjórnandi HönnunarMars og Söru Jónsdóttur, fyrrum stjórnanda HönnunarMars sem gefa ábendingar um dagskrá hátíðarinnar.

Í hönnunarspjallþætti dagsins verður einnig farið yfir sýningar og viðburði dagsins og það sem framundan er á hátíðinni með vel völdum einstaklingum, sem og lifandi samtal um hönnun í ljósi hamfarahlýnunar, hraðra tækniframfara, samfélagsbreytinga og nú síðast covid 19.

Markmiðið með þessu er að veita innsýn í hugskot hönnuða, viðfangsefni og hugmyndir um framtíðina. Auk þess að hvetja til breiðs samtals um hönnun og arkitektúr. Umsjón með hönnunarspjallinu hafa Hlín Helga Guðlaugsdóttir stjórnandi DesignTalks og Garðar Eyjólfsson fagstjóri meistaranáms í hönnun við LHÍ. Upptaka er í höndum Einars Egilssonar og útlit hefur Steinn Einar Jónsson hannað.

HönnunarMars stendur yfir frá 24. til 28. júní og má nálgast dagskrá og frekari upplýsingar á vefsíðu HönnunarMars. Nokkrir einstaklingar hafa líka gert sína eigin dagskrá undir yfirskriftinni Minn eigin HönnunarMars og er sífellt að bætast í hópinn. Sara Jónsdóttir og Greipur Gíslason, fyrrverandi stjórnendur HönnunarMars eru líka virk á Instagram, þar sem þau birta dagskrá hvers dags sem þau eru búin að setja saman undir #jointexdirectorsprogram.

HönnunarMars 2020 átti að fara fram í lok marsmánaðar eins og undanfarin ellefu ár, en vegna Covid-19 faraldursins var hátíðinni frestað til 24.-28. júní. Á hátíðinni leiðir framsækin hönnun og nýjungar saman sýnendur og gesti.

HönnunarMars fer fram með breyttu sniði í ár en tugir hönnuða taka þátt og allir ættu að geta fundið eitthvað við sitt hæfi. Nánar verður fjallað um hátíðina hér á Vísi næstu daga. Einhverjir viðburðir eru opnir lengur en þessa fimm daga og nánar má lesa um dagskránna á vef HönnunarMars.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.



Velkomin á Vísi. Þessi vefur notar vafrakökur. Sjá nánar.