Dæmdur fyrir net­sam­skipti við „Erlu 2004“

Karlmaður var í Héraðsdómi Suðurlands í síðustu viku dæmdur í tveggja mánaða skilorðsbundið fangelsi fyrir tilraun til kynferðislegrar áreitni gegn barni. Maðurinn átti í kynferðislegum netsamskiptum við notanda sem þóttist vera 13 ára stúlka.

Maðurinn var ákærður fyrir að hafa aðfaranótt föstudagsins 25. ágúst 2017 „ítrekað viðhaft kynferðislegt og ósiðlegt orðbragð“ með ritsamskiptum í gegnum spjallforritið Skype við aðila með notandanafnið Erla 2004. Maðurinn taldi notandann vera 13 ára stúlku.

Í ákæru segir að hann hafi spurt hana fjölda kynferðislegra spurninga, lýst fyrir henni og spurt hana um kynferðisathafnir sem hann langaði að stunda með henni, og í einhverjum tilvikum annarri stúlku. Þá bað hann hana ítrekað um að senda sér mynd af kynfærum hennar, bauðst til að senda henni mynd af sínum eigin kynfærum og bað stúlkuna jafnframt um að sýna sig á kynferðislegan hátt í gegnum vefmyndavél.

Maðurinn viðurkenndi skýlaust að hafa gert sekur um þá háttsemi sem honum er gefið að sök í ákæru. Litið var til þess við ákvörðun refsingar að maðurinn hafði sjálfur samband við lögreglu til að tilkynna brot sitt strax daginn eftir að það var framið.

Þá var einnig skýrsla tekin af viðmælanda mannsins, þeim sem þóttist vera 13 ára stúlkan. Engin frekari deili eru sögð á viðmælandanum í dómi, þ.e. aldur eða kyn.

Refsing mannsins þótti hæfilega ákveðin fangelsi í tvo mánuði. Með tilliti til skýlausrar játningar hans, sem og þess dráttar sem varð á meðferð málsins, var refsingin gerð með öllu skilorðsbundin. Manninum var jafnframt gert að greiða allan sakarkostnað, auk launa skipaðs verjanda síns, alls um 800 þúsund krónur.