Mál Ágústar Elís í biðstöðu

Mál handboltamarkvarðarins Ágústar Elís Björgvinssonar eru í óvissu. Í lok janúar var greint frá því að hann hefði skrifað undir tveggja ára samning við KIF Kolding í Danmörku. Félagið á hins vegar í miklum fjárhagskröggum og framtíð þess er óljós.

„Í raun og veru er komin ný stjórn sem er að reyna að fjármagna félagið. Það er með eitthvað fjármagn til að reka það varðandi samninga en vantar að loka holunni. Þetta er mjög óljós staða eins og er,“ sagði Arnar Freyr Theodórsson, umboðsmaður Ágústar, í samtali við Vísi.

Í dönskum fjölmiðlum kom fram að ný stjórn Kolding þyrfti að safna fimm til sex milljónum danskra króna (100-120 milljónum íslenskra króna) til að halda félaginu á floti.

„Þessar tölur sem komu fram í fjölmiðlum eru ekki alveg réttar. En frekari fréttir ættu að berast innan tveggja til þriggja vikna. Núna stendur bara yfir vinna hjá þeim að ná sér í styrktaraðila og stuðningsmenn svo hægt sé að fjármagna félagið,“ sagði Arnar.

En hvað ef allt fer á versta veg og Kolding verður gjaldþrota? Eru aðrir kostir í stöðunni?

„Það er vinnan mín, að vera með plan ef þetta klikkar. En hann er með gildan samning þar til félagið verður lýst gjaldþrota eða einhver úr stjórn lýsir yfir vilja að leysa hann undan samningi,“ sagði Arnar.

„Við erum í biðstöðu en ég er með plön ef þetta dettur upp fyrir og er búinn að vinna í nokkrum málum sem verða vonandi enn til staðar þegar, eða ef, þetta losnar.“

Undanfarin tvö ár hefur Ágúst leikið með Sävehof í Svíþjóð. Hann varð sænskur meistari á fyrsta tímabili sínu hjá Sävehof og á því síðasta lék hann með liðinu í Meistaradeild Evrópu.

Árni Bragi Eyjólfsson og Ólafur Gústafsson léku með Kolding á síðasta tímabili. Eftir það fóru þeir báðir frá félaginu og til KA.