Innlent

Eyjamenn ráða ráðum sínum varðandi töluna tvö þúsund

Kolbeinn Tumi Daðason skrifar
Þjóðhátíð með hefðbundnu sniði virðist úr myndinni miðað við tillögu sóttvarnalæknis í minnisblaði til ráðherra.
Þjóðhátíð með hefðbundnu sniði virðist úr myndinni miðað við tillögu sóttvarnalæknis í minnisblaði til ráðherra. Vísir/Vilhelm

Framkvæmdastjóri ÍBV sem stendur fyrir fjölmennum fótboltamótum fyrir stráka og stelpur auk árlegrar Þjóðhátíðar í Herjólfsdal segir Eyjamenn vera að melta stöðuna.

Fram kemur í minnisblaði sóttvarnarlæknis til heilbrigðisráðherra að lagt sé til að fjöldasamkomur hér á landi verði takmarkaðar við að hámarki tvö þúsund manns, að minnsta kosti út ágúst.

Orkumótið og Pæjumótið eru haldin árlega, um miðjan og lok júní, í Vestmannaeyjum. Mótin eru að jafnaði mjög vel sótt en um þúsund börn eru skráð til þátttöku í ár. Börnunum fylgja jafnan foreldrar og jafnvel heilu fjölskyldurnar.

Verið að melta stöðuna

Þjóðhátíð fer fram ár hvert um Verslunarmannahelgina. Eyjamenn hafa verið tregir til að gefa upp fjölda seldra miða en áætlað hefur verið að hátt í tuttugu þúsund manns sæki hátíðina ár hvert.

Hörður Orri Grettisson í Herjólfsdal.Aðsend

Hörður Orri Grettisson, framkvæmdastjóri ÍBV, sagði í samtali við fréttastofu um helgina að gerðar hefðu verið ráðstafanir til að fresta fótboltamótunum fram á sumarið, kæmi til þess. Rúmlega hundrað dagar væru í þjóðhátíð og ekki hefði enn sem komið er þótt ástæða til að hnika frá plönum með hátíðina.

Hörður Orri sagði í stuttu samtali við fréttastofu á þriðja tímanum í dag eðlilegt að margir hugsuðu til Eyja varðandi samkomur í sumar.

„Við erum bara að melta stöðuna og munum senda frá okkur eitthvað í dag,“ sagði Hörður Orri.

Ljóst er að engin þjóðhátíð myndi þýða gríðarlegt tekjutap fyrir íþróttastarf í Vestmannaeyjum.

Hugsa út fyrir boxið

Tillögur Þórólfs Guðnasonar um viðmiðunartöluna tvö þúsund hafa ekki verið samþykktar af Svandísi Svavarsdóttur heilbrigðisráðherra. Hún hefur hins vegar hingað til farið í einu og öllu eftir tillögu hans.

„Þetta er það sem sóttvarnarlæknir er að hugsa um og leggja til. Ég held að það sé mjög mikilvægt fyrir þá að undirbúa stóra viðburði að hafa það bak við eyrað,“ segir Svandís.

„Ég held að fólk ætti strax að byrja að husa út fyrir boxið hvernig er hægt að gera sér glaðan með fleiri og minni hópum.“


Tengdar fréttir

Þessum takmörkunum verður aflétt 4. maí

Fjöldamörk samkomubanns verða hækkuð úr 20 í 50 manns, opnað verður fyrir hefðbundið skólahald í leik- og grunnskólum, framhalds- og háskólar verða opnaðir með takmörkunum og heimilt verður að hefja á ný ýmsa þjónustu.

Ómögulegt að segja til um hvenær ferðalög til og frá Íslandi komist í samt horf

Dómsmálaráðherra segir að ómögulegt að segja til um hvenær ferðalög til og frá Íslandi muni komast aftur í samt horf. Ísland mun taka þátt í framlengingu á lokun ytri landamæra ESB til 15. maí. Ferðaþjónustan kallar eftir svörum um það hvort settar verði einhvers konar hömlur á komum ferðamanna til landsins þegar landið opnast að nýju.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×