Menn hafa vikið fyrir minna en mistökin í Aserta-málinu

Þingflokksformaður Sjálfstæðisflokksins segir að þeir sem stóðu að málsókn gegn fólki í Aserta„málinu og fleiri skyldum málum skuldi þeim einstaklingum sem voru ákærðir að minnsta kosti afsökunarbeiðni. Þá þurfi að svara því hvers vegna Seðlabankinn tryggði ekki betur lagastoð fyrir aðgerðum sínum í þessum málum.

Í janúar árið 2010 var boðað til blaðamannafundar sem á sér fá fordæmi á Íslandi þar sem greint var frá ákærum á fjóra nafngreinda einstaklinga í fyrirtækinu Aserta fyrir stórfelld gjaldeyrismisferli. Ekki var dæmt í málinu fyrr en í Héraðsdómi Reykjaness í desember árið 2014 þar sem allir sakborningar voru sýknaðir.

Sjá einnig: Sex ára martröð Aserta-manna lokið

Ákæruvaldið tók sér síðan 14 mánuði til að ákveða hvort áfrýja ætti málinu til Hæstaréttar og ákvað svo á föstudag í síðustu viku að gera það ekki. Þá höfðu þessir fjórmenningar haft stöðu grunaðra manna í sex ár.

Ragnheiður Ríkharðsdóttir þingflokksformaður Sjálfstæðisflokksins gagnrýndi allan þennan málatilbúnað harðlega í þættinum á Sprengisandi á Bylgjunni í morgun.

„Það er náttúrlega ótrúlega dapurt í fyrsta lagi að fulltrúar frá Seðlabanka, Ríkissaksóknara og Fjármálaeftirlitinu skuli boða til fundar með þeim hætti sem þá var gert. Þá sagði forstöðumaður Fjármálaeftirlitsins, Gunnnar Andersen, að fundurinn ætti að hafa fælingarmátt. Þar eru nánast nafngreindir þeir einstaklingar sem hlut áttu að máli hjá Aserta fyrirtækinu. En málatilbúnaðurinn allur er byggður á reglum um gjaldeyrismál frá Seðlabankanum sem ekki höfðu lögskilið samþykki ráðherra,” sagði Ragnheiður.

Sjá einnig: Ragnheiður spyr hver ætli að axla ábyrgð á Aserta-málinu

Nú hafi þrjú samskonar mál fallið vegna þess að Seðlabankinn hefði ekki aflað sér nauðsynlegs samþykktar ráðherra á þeim reglum sem sótt var til saka eftir. Þeir sem komu að málunum hafi síðan nánast ekkert tjáð sig um þessi mistök og þess vegna sé því ósvarað hvernig svona lagað geti gerst í þrígang.

„Og hvað kallar það á? Kallar það á að öll þessi fyrirtæki, allir þessir einstaklingar, fari í skaðabótamál og við hvern þá? Þeir færu í skaðabótamál við ríkið. Því allt eru þetta ríkisstofnanir,“ segir Ragnheiður.

Hún kalli eftir ábyrgð í þessu máli; í það minnsta að þeir sem voru ákærðir í þessum málum verði beðnir afsökunar.

Ertu að kalla eftir því að fólk segi af sér, víki,“ spurði Sigurjón M. Egilsson.

„Menn hafa nú vikið fyrir minna,“ svaraði Ragnheiður Ríkharðsdóttir.

Samtalið má heyra hér að ofan.