Málum peningamarkaðssjóðanna hugsanlega vísað til lögreglu

Til greina kemur að Fjármálaeftirlitið vísi rannsókn á peningamarkaðssjóðunum til lögreglu þyki athugun Fjármálaeftirlitsins á starfsemi sjóðanna gefa tilefni til þess. Þetta kemur fram í yfirlýsingu sem viðskiptaráðherra hefur sent fjölmiðlum.

Ráðuneytið segir það vera óumdeilt að í ákveðnum tilvikum hafi fjárfestingar í peningamarkaðssjóði Landsbankans verið kynntar sem áhættulausar. NBI hf., sem er nýtt nafn Landsbanka Íslands, og Landsvaki hf., hafi viðurkennt að um mistök hafi verið að ræða og beðið viðskiptamenn afsökunar á þessu. Gögn í málinu hafi verið send Fjármálaeftirlitinu vegna þessa.

Ásakanir um villandi markaðssetningu

Í yfirlýsingu ráðuneytisins segir jafnframt að hópur hlutdeildarskírteinishafa í peningamarkaðssjóði Landsbankans hafi gert ráðuneytinu grein fyrir ásökunum fjölmargra einstaklinga um að markaðssetning á peningamarkaðssjóði Landsbankans hafi verið villandi og á köflum beinlínis röng. Í ofanálag séu uppi ásakanir um að óeðlilega stórum hluta fjármuna sjóðsins hafi verið fjárfest í félögum tengdum eigendum Landsbankans. Ennfremur séu uppi ásakanir um að í fyrstu viku októbermánaðar þessa árs, hafi hlutdeildarskírteinishöfum verið ráðið frá því að taka út fé sitt úr peningamarkaðssjóði þó einstökum viðskiptavinum hafi verið ráðlagt að flytja fé sitt í öruggara sparnaðarform.

Samkvæmt upplýsingum viðskiptaráðuneytisins er Fjármálaeftirlitið þessa stundina að rannsaka ýmis atriði varðandi peningamarkaðssjóðina allra viðskiptabankanna, þar á meðal fjárfestingar þeirra og markaðssetningu. Ráðuneytið segir að rannsókn sé ekki lokið en reynt verði að ljúka henni sem allra fyrst á nýju ári. Sé ástæða til muni FME vísa málinu til lögreglu, í samræmi við lög um fjármálafyrirtæki

Vegna eðlis og umfangs málsins sé viðbúið að væntanleg rannsóknarnefnd á vegum Alþingis taki málefni peningamarkaðssjóða til sérstakrar skoðunar.

Samsetning sjóðanna verði gerð opinber

Í yfirlýsingunni segir jafnframt að líklegt sé að einhverjir kjósi að skjóta ágreiningi til úrskurðarnefndar um viðskipti við fjármálafyrirtæki eða að höfða mál gegn rekstrarfélagi peningamarkaðssjóðsins. Til að tryggja eðlilega málsmeðferð sé afar mikilvægt að engum mikilvægum upplýsingum er varði rekstur sjóðsins og ráðstöfun fjármuna hans sé haldið frá hlutaðeigandi. Viðskiptaráðherra telji mjög brýnt að samsetning peningamarkaðssjóðs Landsbankans verði gerð opinber. Með því verði unnt að draga úr tortryggni milli málsaðila og stuðla að sanngjarnri niðurstöðu málsins.