Fabregas hefur áhyggjur af hnénu

Cesc Fabregas, miðjumaður Arsenal, sagði í samtali við útvarpsstöð Marca á Spáni að hann hefði áhyggjur af hnémeiðslunum sem urðu til þess að hann þurfti að fara af velli í hálfleik gegn Liverpool í gær.

"Þessi hnémeiðsli leggjast illa í mig en ég veit meira um þau á mánudag," sagði spænski landsliðsmaðurin í útvarpsviðtalinu.

Fréttir frá Spáni létu í veðri vaka að liðbönd í hné kappans væru sködduð, en Arsene Wenger hefur þó ekki stórar áhyggjur af málinu.

"Þetta gæti þýtt eina viku eða þrjár, en það er erfitt að meta það," sagði Wenger.