Kauphöllin áminnir Exista og sektar um 4 milljónir kr.

Kauphöllin hefur veitt Exista opinbera áminningu og fésekt vegna brota á ákvæðum reglna um viðskipti í Kauphöllinni. Sektin nemur 4 milljónum kr..

Í tilkynningu kauphallarinnar um málið segir að Exista hafi verið skylt að sækja um skráningu á nýju hlutafé í kjölfar þeirrar ákvörðunnar félagsins að hækka hlutaféið um 50 milljarða kr.. Um var að ræða þá ákvörðun stjórnar Exista frá 30. október að auka hlutaféið um þessa upphæð í skiptum fyrir einn milljarð hluta í Kvakki óskráðu eignarhaldsfélagi þeirra Bakkabræðra. Tilkynning um málið barst 8. Desember.

Kaupþing óskaði í framhaldinu skýringa frá Exista um afhverju ofangreindir hlutir hefðu ekki verið teknir til viðskipta í samræmi við reglur kauphallarinnar. Eftir bréfaskipti telur Kauphöllin að Exista hafi verið skylt að sækja um skráningu á nýju hlutafé. „Ekkert er fram komið í málinu sem gefur til kynna að viðskipti hafi ekki getað hafist með hlutabréfin um leið og þau voru gefin út" segir í niðurstöðum kauphallarinnar.

Því telur kauphöllin að Exista hafi brotið alvarlega gegn rétti fjárfesta á því að fá upplýsingar um útgefenda hlutabréfa og verðbréf sem tekin hafa verið til viðskipta.

Þá átelur kauphöllin Lýð Guðmundsson stjórnarformann Exista fyrir að hafa í viðtali við Björn Inga Hrafnsson, í Markaðinum á Stöð 2 þann 25. október s.l., gefið upplýsingar um stöðu félagsins og kröfur þess á hendur íslensku bönkunum.

Sökum viðtalsins fór kauphöllin fram á það við Exista að félagið birti upplýsingar um stöðu krafna á hendur bönkunum og fjárhagslega stöðu þess.

Í niðurstöðum sínum segir kauphöllin m.a.: „Útgefandi verðbréfa ber ábyrgð á því að upplýsingar sem geta talist hafa marktæk áhrif á markaðsverð verðbréfa hans séu birtar í samræmi við ákvæði reglna Kauphallarinnar og að slíkar upplýsingar komi ekki fram í fjölmiðlum áður en þær eru gerðar opinberar með fullnægjandi hætti í samræmi við fyrrgreind ákvæði."

Í tilkynningu um málið segir Exista undrast ákvörðun Kauphallar frá því í dag 20. desember enda er þar algerlega litið framhjá sjónarmiðum félagsins í viðkomandi máli. Samkvæmt ákvörðuninni bar Exista að hefja skráningarferli á nýjum hlutabréfum í flokki sem Kauphöllin hafði þegar samþykkt að taka úr viðskiptum í Kauphöllinni og hluthafafundur Exista hafði auk þess farið fram á að yrði afskráður tafarlaust.

Vandséð er hvernig slíkt skráningarferli hefði þjónað hagsmunum fjárfesta og hluthafa félagsins. Exista hefur jafnframt leitast við að upplýsa fjárfesta um óvissa stöðu félagsins eins og kostur er, án þess að gefa út ótímabærar áætlanir og ágiskanir um væntanlega útkomu viðræðna sem félagið á nú í við tugi innlendra og erlendra fjármálastofnana. Með þeim hætti telur Exista að fylgt hafi verið ábyrgri upplýsingagjöf til fjárfesta. Exista er því ósammála ákvörðun Kauphallar en hyggst að öðru leyti ekki tjá sig um hana að svo stöddu.