Erlent

Skarpasta myndin af yfirborði Mars til þessa

Kjartan Kjartansson skrifar
Hluti af víðmynd Curiosity sem var sett saman úr myndum sem voru teknar á yfirborði Mars frá 24. nóvember til 1. desember árið 2019.
Hluti af víðmynd Curiosity sem var sett saman úr myndum sem voru teknar á yfirborði Mars frá 24. nóvember til 1. desember árið 2019. NASA/JPL-Caltech/MSSS

Víðmynd sem bandaríski könnunarjeppinn Curiosity tók í fyrra er sú skarpasta sem tekin hefur verið af yfirborði Mars. Bandaríska geimvísindastofnunin NASA birti myndina í gær sem er samsett úr fleiri en þúsund myndum og 1,8 milljörðum díla.

Það tók Curiosity meira en sex og hálfa klukkustund yfir fjögurra daga tímabil í nóvember að taka myndirnar sem voru síðan settar saman í víðmyndina, að því er segir í tilkynningu á vef NASA. Myndirnar voru teknar í Glen Torridon, svæði í hlíðum Sharp-fjalls sem Curiosity kannar nú á meðan flestir starfsmenn leiðangursins voru í fríi yfir þakkargjörðarhátíðina í Bandaríkjunum.

Á myndinni má sjá sendinn og grýttan jarðveginn í næsta umhverfi könnunarjeppans, hóla og hlíðar og bláleitan himininn í fjarska.

Curiosity lenti í Gale-gígnum á Mars í ágúst árið 2012. Frá árinu 2014 hefur jeppinn rúntað um rætur Sharp-fjalls í miðju gígsins og leitað að ummerkjum um fljótandi vatn sem talið er að hafi flætt yfir yfirborð Mars í fyrndinni.

Hér má finna víðmyndir Curiosity í hæstu mögulegu upplausn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.