Redknapp: Gomes var frábær

Harry Redknapp hrósaði markverðinum Heurelho Gomes í hástert í kvöld eftir að hinn oft á tíðum skrautlegi Brasilíumaður átti stórleik í 0-0 jafntefli Tottenham og Manchester United.

Gomes varði oft á tíðum mjög vel í marki Tottenham og bætti ef til vill upp fyrir röð skelfilegra mistaka sem kostuðu liðið nokkur stig í haust.

"Hann var frábær í kvöld. Tony Parks (markvarðaþjálfari) hefur unnið vel með honum og ég held að hann sé að verða búinn að finna sig. Við höfum séð miklar framfarir hjá honum. Menn hafa sett spurningamerki við það hvort hann sé markvörður á heimsmælikvarða - en ég held að hann sé aðeins farinn að sína sitt rétta andlit," sagði Redknapp.

Hann útilokar þó ekki að kaupa annan markvörð í janúarglugganum.

"Ég treysti Gomes hvort sem við fáum annan markvörð í janúar eða ekki. Ég er ekki að útiloka að við gerum það, en við erum í góðum málum ef Gomes heldur áfram að spila svona," sagði stjórinn.