Adabeyor: Eboue verður sterkari

Emmanuel Adebayor stendur við bakið á sínum besta vini hjá Arsenal, Emmanuel Eboue. Hann segist sannfærður um að Eboue muni jafna sig fljótt á atburðum helgarinnar.

Eboue kom inn sem varamaður í fyrri hálfleik gegn Wigan en fann sig ekki og bauluðu stuðningsmenn Arsenal á hann fyrir slaka frammistöðu. Á endanum var Eboue tekinn aftur af velli í lokin.

„Við stöndum allir saman og ég vorkenni Emmanuel Eboue. Hann er einn af mínum bestu vinum. Stuðningsmenn bauluðu á hann en svona gerist bara í fótboltanum," sagði Adebayor í viðtali á heimasíðu Arsenal.

„Þetta mun bara styrkja hann. Við finnum til með honum því hann hefur verið að glíma við meiðsli og það er erfitt fyrir hann að koma svona til baka," sagði Adebayor en Arsenal vann Wigan 1-0 og er enn með í baráttunni um Englandsmeistaratitilinn.

Arsene Wenger, stjóri Arsenal, hefur einnig sýnt Eboue stuðning og ætlar að hafa hann í byrjunarliðinu í leiknum gegn Porto í Meistaradeildinni á miðvikudag.