Redknapp ætlar ekki að kaupa í janúar

Harry Redknapp stjóri Tottenham á ekki von á að kaupa leikmenn til félagsins þegar janúarglugginn opnast. Hann reiknar þó með því að fá einn eða tvo leikmenn að láni.

Tottenham hefur mikið verið orðað við enska landsliðsframherjann Emile Heskey sem verður með lausa samninga hjá Wigan í sumar og má því ræða við önnur félög í janúar.

Redknapp segist ekki eiga von á að framherjinn fari frá Wigan í janúar heldur bíði fram á sumar þegar honum standi allar dyr opnar.

"Ef hann bíður fram á sumar getur hann ráðið því sjálfur hvert hann fer og hagnast mest á því. Ég er búinn að funda með stjórnarformanninum og hér mun enginn eyða miklum peningum. Ég vil heldur ekki eyða stórfé og mun frekar leitast við að fá einn eða tvo menn hingað á lánssamningi," sagði Redknapp.