Tottenham sótti þrjú stig á Upton Park

Tottenham komst upp að hlið West Ham í ensku úrvalsdeildinni í kvöld með 2-0 útisigri á Hömrunum. Ledley King og Jamie O'Hara skoruðu mörkin í leiknum.

King kom Tottenham yfir með fallegum skalla á 68. mínútu eftir sendingu frá Aaron Lennon. West Ham átti að fá vítaspyrnu skömmu síðar þegar Benoit Assou-Ekotto varði knöttinn með hendi en ekkert var dæmt.

Þegar venjulegum leiktíma var að ljúka fór West Ham illa með dauðafæri. Tottenham refsaði strax á eftir með laglegu marki frá O'Hara. Bæði lið eru nú með 18 stig, þremur stigum frá fallsæti.

Einn leikur var í ensku 1. deildinni í kvöld. Crystal Palace stökk upp í 5. sæti deildarinnar með 3-0 sigri á Southampton sem er í 20. sæti, fjórum stigum frá fallsæti.