Peter Reid vill taka við Sunderland á ný

Peter Reid, fyrrum knattspyrnustjóri Sunderland, segist vel geta hugsað sér að taka aftur við liðinu sem hann stýrði á árunum 1995-2002.

Sunderland er stjóralaust í augnablikinu eftir að Roy Keane sagði starfi sínu lausu, en Reid útilokar ekki að snúa aftur til Englands. Hann er sem stendur landsliðsþjálfari Tælendinga.

"Ég hef áhuga," sagði Reid í samtali við Daily Mail. "Allir vilja vinna á Englandi og ég er með ákvæði í samningi mínum sem gefur mér leyfi til að ræða við ensk lið ef þau sýna áhuga. Þetta er því undir Niall Quinn (stjórnarformanni) komið," sagði Reid.

Auk hans hefur Sam Allardyce, fyrrum stjóri Bolton og Newcastle, verið nefndur til sögunnar sem mögulegur stjóri Sunderland.