Sækja aftur um atvinnuleyfi fyrir Manucho

Sir Alex Ferguson er ákveðinn að landa framherjanum Manucho frá Angóla sem fyrst til Manchester United og ætlar að sækja aftur um atvinnuleyfi fyrir hann á Englandi.

Manucho lék vel með landsliði sínu í Afríkukeppninni á dögunum en er nú farinn til Panathinaokos í Grikklandi sem lánsmaður eftir að honum var meinað atvinnuleyfi á Englandi.

"Í ljósi þess hve vel Manucho spilaði með Angóla í Afríkukeppninni munum við sækja aftur um leyfi fyrir hann í sumar og þá gæti hann vonandi spilað fyrir okkur á næstu leiktíð," asagði Ferguson.

Reglur í Bretlandi segja að útlendingar á borð við Manucho verði að hafa spilað 75% landsleikja fyrir þjóð sína á síðustu tveimur árum til að fá atvinnuleyfi á Englandi, en annars verði þeir að fá undanþágu til atvinnuleyfis.

Mancuho fékk ekki slíka undanþágu þegar sótt var um atvinnuleyfi fyrir hann fyrst, en frammistaða hans í Afríkukeppninni gæti orðið til þess að greiða leið hins 24 ára gamla framherja til Englands. Hann skoraði fjögur mörk fyrir Angóla í Afríkukeppninni sem lauk í Gana á dögunum.