Góður árangur ef stöðug króna næst á tveimur mánuðum

Poul Thomsen forstöðumaður aðstoðar Alþjóðagjaldeyrissjóðsins (AGS) við Ísland, segir að það verði metið sem góður árangur ef tekst að koma stöðugleika á gengi krónunnar á næstu tveimur mánuðum. Thomsen reiknar með að eftir það verði dregið úr þeim hömlum sem nú eru á viðskipti með erlendan gjaldeyri.

Þetta kemur fram í viðtali sem birt hefur verið við Thomsen á heimasíðu AGS. Hann segir að ef stöðugleikinn náist muni stjórnvöld geta dregið úr stýrivöxtum sínum á næsta ári ásamt því að opna ennfrekar fyrir frjálsu flæði fjármagns til og frá landinu.

Thomsen segir að hrun íslenska bankakerfisins geri það að verkum að nú sé í gangi kostnaðarsamast endurbygging á hagkerfi sem til er í sögunni. Er hann þá að miða við höfðatölu.

Thomsen er bjartsýnn á horfurnar í efnahagslífi landsins til lengri tíma litið. Hann segir að þótt næstu tvö ár verði erfið sé hagkerfið sveigjanlegt sem vegi upp á móti erfiðleikunum. Og hann vitnar til sögunnar og segir að Ísland hafi oft orðið fyrir stórum áföllum í fortíðinni en ætíð náð að rífa sig upp úr þeim aftur á tiltölulega skömmum tíma.