Ekki aðhafst vegna kaupa Birnu í Glitni

Fjármálaeftirlitið (FME) telur ekki tilefni til aðgerða af hálfu eftirlitsins gagnvart Birnu Einarsdóttur, forstjóra Nýja Glitnis, eða Melkorku ehf., fjárestingarfélagi hennar.

FME hefur haft til skoðunar kaup Birnu á hlutabréfum gamla Glitnis sem ekki gengu í gegn.

„Þar sem málið hefur fengið talsverða opinbera umfjöllun vill Fjármálaeftirlitið taka eftirfarandi fram. Gögn málsins, m.a. tölvupóstur og viðskiptayfirlit, sýna að umrædd hlutabréfaviðskipti náðu í raun ekki fram að ganga vegna vanrækslu af hálfu „gamla“ bankans.

Ekkert í gögnum málsins bendir til annars en að Birna Einarsdóttir hafi verið í góðri trú og að vanefnd stafi af ástæðum sem eru óviðkomandi henni,“ segir í tilkynningu FME, síðdegis í gær.

Þar kemur jafnframt fram að athugun á tilkynningar- og birtingarskyldu „gamla“ Glitnis standi enn yfir.