Gerrard: Við erum martröð allra liða

Steven Gerrard, fyrirliði Liverpool, segist ekki geta beðið eftir því að fara með lið sitt í annan úrslitaleik Meistaradeildarinnar á tveimur árum. Hann segir það martröð fyrir hvaða lið sem er að mæta Liverpool í keppninni því þeir rauðu gefist aldrei upp.

"Okkur hefur ekki gengið sérstaklega vel í deildinni heima, en við erum frábærir í Evrópu. Við erum martröð allra liða því við látum ekkert slá okkur út af laginu og gefumst aldrei upp. Okkur var sýnd lítil virðing í vetur en erum nú á leið í annan úrslitaleik okkar á tveimur árum. Það er ekki aðeins rós í hnappagat félagsins á sögulegum grunni, heldur er það til marks um styrk liðsins í dag og framtíð þess. Nú verðum við að drífa okkur í úrslitaleikinn og reyna að koma bikarnum heim á ný. Við höfum enga ástæðu til að óttast nokkuð lið eftir að vera búnir að slá Barcelona og Chelsea út úr keppninni," sagði Gerrard í samtali við The Sun.