Stóri Sam hefur áhuga á Sunderland

Sam Allardyce þykir líklegasti eftirmaður Roy Keane í stjórastólinn hjá Sunderland að mati enskra veðbanka. Stóri Sam segist hafa áhuga á starfinu.

Allardyce spilaði með Sunderland til skamms tíma í upphafi níunda áratugarins og starfaði sem þjálfari þar þegar Peter Reid var knattspyrnustjóri liðsins.

Allardyce virðist hafa mikinn áhuga á að snúa aftur í úrvalsdeildina ef marka má viðtal við hann í Sun í dag.

"Sunderland er frábær klúbbur og auðvitað myndi ég hafa áhuga á að ræða við félagið. Ég ber mikla virðingu fyrir Niall Quinn og því starfi sem hann hefur unnið. Ég naut mín vel þegar ég spilaði fyrir félagið og líka þegar ég vann með Peter Reid sem þjálfari. Sunderland er líka lið sem á frábæra stuðningsmenn," sagði Allardyce.