Keane: Mörkin munu koma

Robbie Keane segir að umræðan um framtíð sína hjá Liverpool hafi ekki áhrif á sig og er viss um að hann fari bráðum að skora mörk.

Þessi 28 ára sóknarmaður hefur ollið miklum vonbrigðum síðan hann var keyptur frá Tottenham síðasta sumar og sum ensk blöð héldu því fram að hann gæti verið á leið aftur á White Hart Lane.

„Ég hef fulla trú á eigin getu og veit að ég mun skora fullt af mörkum fyrir félagið. Ég hef engar áhyggjur og finnst því að aðrir ættu ekki að hafa þær. Það á eftir að koma mikið meira út úr mér," sagði Keane.

Hann hefur aðeins skorað fjögur mörk í 23 leikjum fyrir Liverpool og var geymdur á bekknum í leik gegn Blackburn um síðustu helgi. Rafa Benítez, stjóri Liverpool, segist þó hafa trú á Keane og hafi ekki hugsað út í það að selja hann aftur í janúar. 

„Ég hef skorað mörg mörk síðustu tíu ár og hæfileikinn að skora hverfur ekkert svona. Ég hef ekki verið hérna lengi og stundum tekur það smá tíma að finna sig í nýju liði. Ég vil vera dæmdur þegar ég hef verið hérna í smá tíma," sagði Keane.