Kröfuhafar Kaupþings vilja ekki eignast banka á Íslandi

Erlendir kröfuhafar Kaupþings, sem nú funda hérlendis, eru tregir við að verða hluthafar bankans. Það sé ekki efst á óskalista þeirra að eiga fjármálastofnun á Íslandi.

Fulltrúar stærstu kröfuhafa Kaupþings komu hingað til lands í gær og funduðu í bankanum í dag. Kröfuhafarnir eiga um helming af skuldum bankans. Þetta er í annað sinn sem kröfuhafar funda með fulltrúum Kaupþings en fyrsti fundurinn var í byrjun nóvember.

Kröfuhöfum hefur verið boðið að gerast hluthafar að bankanum en það þýðir að þeir þyrftu að koma með gríðarlega fjármuni til landsins til að tryggja fjármögnun bankans. Samkvæmt upplýsingum fréttastofu hafa engir samningar nást en kröfuhafarnir eru sagðir tregir að koma með fjármuni til landsins þar sem það er ekki efst á óskalista þeirra að eiga íslenska fjármálastofnun. Þá er verið að skoða ýmsa möguleika með kröfuhöfum, m.a. að sameina Kaupþing og FIH banka í Danmörku eða að hafa bankann sjálfstæðan hér á landi.

Kröfuhafarnir höfðu ýmsar spurningar á fundinum í dag varðandi rekstur bankans, m.a. afhverju væri verið að selja Kaupþing í Lúxemborg á eina evru. Annar fundur verður haldinn á morgun áður en þeir halda heim á leið.