Miðlað af reynslu Svía

„Lærdómur Svía af fjármálakreppu tíunda áratugarins – byrðunum dreift og nýjar vonir vaktar,“ nefnist fyrirlestur sem Göran Persson fyrrum forsætisráðherra Svíþjóðar, heldur í hátíðasal Háskóla Íslands klukkan 12 í dag.

Fundurinn er í boði Samtaka fjárfesta og Viðskiptafræðideildar Háskólans.

Svíar gengu í gegnum miklar efnahagsþrengingar á tíunda áratug síðustu aldar. Þær sneru meðal annars að bönkunum og sænsku fjármálakerfi, sem gekk í gegnum verulega uppstokkun í kjölfar erfiðleikanna.

Á þessum tíma gegndi Göran Persson starfi fjármálaráðherra Svía og ætlar nú að miðla hér af reynslu sinni og Svía í þessum efnum. Aðgangur að fyrirlestrinum er heimill meðan húsrúm leyfir.