Eldur kom upp í rafmagnskassa í Vestmannaeyjum

Eldur kom upp vegna skammhlaups í rafmagnskassa á Búastaðabraut í Vestmannaeyjum á fimmta tímanum í dag. Slökkvilið vaktaði kassann uns starfsmenn HS-veitna komu á vettvang og rufu strauminn að kassanum.

Þetta kemur fram í Facebook-færslu Slökkviliðs Vestmannaeyja. Þar eru einnig birtar myndir af kassanum eftir að tókst að ráða niðurlögum eldsins, en minniháttar eldur var innan í kassanum eftir að straumur hafði verið rofinn. Sá eldur var slökktur með dufttæki.

„Það er full ástæða að minna fólk á að fara gríðarlega varlega þegar svona lagað á sér stað og halda sig í öruggri fjarlægð, snerta ekki kassann og reyna ekki að slökkva fyrr en örugglega er búið að rjúfa strauminn að kassanum,“ segir í færslunni.

Þá er bent á að þegar uppákomur sem þessar eiga sér stað geti mikill straumur enn verið á kössum sem loga, jafnvel þótt rafmagn sé farið af í nærliggjandi húsum.

Myndband af eldinum er að finna í hlekk neðst í færslu slökkviliðs.