Upp um 907 sæti á heimslistanum og Áskorendamótaröðin innan seilingar

Guðmundur Ágúst Kristjánsson, kylfingur úr Golfklúbbi Reykjavíkur, hefur farið upp um 907 sæti á heimslistanum á síðustu mánuðum. Þá er hann nálægt því að tryggja sér sæti á Áskorendamótaröðinni.

Guðmundur hefur unnið tvö mót á Nordic Tour atvinnumótaröðinni í ár og er annar á stigalista mótaraðarinnar á eftir Svíanum Fredrik Niléhn.

„Topparnir hafa verið meiri. Í fyrra var þetta oft mjög svipað og ég var oft á meðal 20 efstu. En það gerir ekki mikið fyrir mann,“ sagði Guðmundur í samtali við Arnar Björnsson í Sportpakkanum.

Ef Guðmundur vinnur eitt mót í viðbót á Norðurlandamótaröðinni öðlast hann þátttökurétt á Áskorendamótaröðinni.

„Þá fæ ég að vera á Áskorendamótaröðinni það sem eftir lifir þessa árs og allt næsta ár. Það væri mjög mikilvægt að ná einum sigri í viðbót og fara upp á næsta stig,“ sagði Guðmundur sem var í 1656. sæti heimslistans í lok síðasta árs. Nú er hann í 749. sæti.

„Á Áskorendamótaröðinni eru betri leikmenn, hærra verðlaunafé og tækifæri til að komast inn á Evrópumótaröðina. Efstu 15 komast þangað,“ sagði Guðmundur tekur þátt í úrtökumóti fyrir Opna breska meistaramótið á næstunni. Þá verður hann á meðal þátttakenda á Íslandsmótinu í golfi í byrjun ágúst.

Fréttina í heild sinni má sjá hér fyrir neðan.