„Ef þú finnur Mantas máttu endilega láta mig vita“

Keflavík hefur rimmu sína gegn KR í átta liða úrslitum Domino´s-deildar karla í körfubolta á föstudagskvöldið þegar að liðin mætast í fyrsta leik í Blue-höllinni í Reykjanesbæ í beinni útsendingu á Stöð 2 Sport.

Keflvíkingar fengu vænan rassskell í lokaumferðinni gegn Tindastóli á útivelli þar sem að þriðja sætið var í boði en tapið skildi Keflvíkinga eftir í fjórða sæti þar sem þeir hafa þó heimaleikjaréttinn.

„Það var búinn að vera helvíti góður stígandi í þessu hjá okkur þar til við fengum þennan skell á Króknum en við ætlum ekki að dvelja lengi við það. Nú snýst þetta um hvernig að við keyrum þetta í gang strax aftur,“ segir Sverrir sem fær góðan liðsstyrk fyrir úrslitakeppnina.

„Gummi [Guðmundur Jónsson ]kemur vonandi aðeins við sögu í úrslitakeppninni. Hann er langt frá því að vera 100 prósent en vonandi getur hann skilað einhverjum mínútum og það mun hjálpa okkur,“ segir Sverrir.

Það er líka eins gott fyrir Keflvíkinga að Guðmundur ætli að reyna að vera með því Litháinn Mantas Mockevicius hefur ekki sést síðustu daga og ekkert látið heyra í sér.

Mantas vann hug og hjörtu körfuboltaáhugamanna í þeim leikjum sem hann spilaði en þessi pattaralegi bakvörður skoraði 5,2 stig að meðaltali í leik og gaf tvær stoðsendingar og steig oft upp þegar að mest á reyndi.

„Ef þú finnur Mantas þá máttu endilega láta mig vita. Hann hefur ekki mætt og það næst ekkert í hann þannig að hann verður ekki meira með,“ segir Sverrir Þór Sverrisson.

Ítarlega verður rýnt í einvígin fjögur í úrslitakeppninni í sérstökum upphitunarþætti Domino´s-Körfuboltakvölds á Stöð 2 Sport HD klukkan 21.15 í kvöld.

Klippa: Sverrir Þór - Leitin að Mantas