Samdráttur hjá Iceland Travel

Tekjur Iceland Travel, dótturfélags Icelandair og einnar stærstu ferðaskrifstofu landsins, drógust saman um tæp 16 prósent á milli ára samkvæmt nýbirtum ársreikningi.

Tekjur félagsins námu 88 milljónum evra, jafnvirði 12,2 milljarða króna, á síðasta ári samanborið við tæplega 105 milljónir evra á árinu 2017. Að sama skapi drógust rekstrargjöld saman um rúm 16 prósent. Iceland Travel hagnaðist um 1,3 milljónir evra, jafnvirði 180 milljóna króna, á síðasta ári samanborið við 335 þúsund evrur á árinu 2017.

Stjórn félagsins leggur til að greiddur verði 111 milljóna króna arður til eigandans, Icelandair. Þá er gert ráð fyrir að söluferli á Iceland Travel hefjist í haust.

Björn Víglundsson var nýlega ráðinn framkvæmdastjóri Iceland Travel en hann kom í stað Harðar Gunnarssonar sem hafði leitt félagið í tæpan áratug.