Leita bíls með fjölgeislamæli

Leitað var áfram í gær að að Páli Mar Guðjónssyni í Ölfusá. Á vef lögreglunnar kom fram að leitin hefði engan árangur borið. Svæðisstjórn björgunarsveita á svæðinu mun funda með lögreglu um framhaldið eftir helgina.

Fyrir liggur að gera fjölgeislamælingu í farvegi árinnar neðan Ölfusárbrúar við fyrsta tækifæri til að reyna að staðsetja bíl Páls.

Óljóst er hver árangurinn af slíkri mælingu gæti orðið enda áin straumþung og loftbólur í henni. Hvort tveggja takmarkar mjög getu þeirra tækja sem nota þarf við aðgerðirnar.

Björgunarsveitum og viðbragðsaðilum öllum voru í gær færðar þakkir frá lögreglunni og aðstandendum Páls fyrir mikið og óeigingjarnt starf við leitina.