Alli gæti snúið til baka um helgina

Dele Alli er byrjaður að æfa með Tottenham á ný eftir rúman mánuð í meiðslum.

Enski landsliðsmaðurinn hefur ekki spilað fyrir Tottenham síðan 20. janúar en gæti komið við sögu um næstu helgi þegar Tottenham heimsækir Southampton.

Hann var þó ekki orðinn nógu góður til þess að hafa ferðast með liðinu til Þýskalands, en Tottenham mætir Borussia Dortmund í seinni leik liðanna í 16-liða úrslitum Meistaradeildar Evrópu.

Mauricio Pochettino sagði styttast í að Alli sé tilbúinn og vonast til að hann verði með gegn Southampton.

Tottenham hefur misst af lestinni í toppbaráttunni í ensku úrvalsdeildinni en er í mjög vænlegri stöðu í Meistaradeildinni eftir 3-0 sigur gegn Dortmund á Wembley.