ÍBV svarar Þorgeiri: „Talaðu svo meira um þroskaða og málefnalega umræðu“

Yfirlýsingarnar halda áfram að ganga á milli Hauka og ÍBV en liðin eigast við í undanúrslitum Olís-deildar karla. Staðan er 2-1 fyrir Haukum í leikjum.

Í leik tvö sauð allt upp úr þar sem fjögur rauð spjöld fóru á loft. Kári Kristján Kristjánsson var dæmdur í þriggja leikja bann og við það voru Eyjamenn mjög ósáttir.

Síðan þá hafa Eyjamenn tjáð sig mikið um dóminn en Haukarnir svöruðu þeim í dag með yfirlýsingu. Nú hafa Eyjamenn svarað þeirri yfirlýsingu en þeir sendu fjölmiðlum yfirlýsinguna nú undir kvöld.

Þar svara þeir formanni Hauka, Þorgeiri Haraldssyni fullum hálsi sem skrifaði yfirlýsingu Hauka í dag. Yfirlýsingu Eyjamanna sem barst nú undir kvöld má sjá hér að neðan.

Yfirlýsingin í heild sinni

ÍBV svarar Þorgeiri

Þorgeir Haraldsson formaður handknattleiksdeildar Hauka og fyrrum stjórnarmaður í HSÍ sendi frá sér yfirlýsingu þann 6. maí.

Þar kemur fram og er staðfest af Þorgeiri að Heimir Óli hafi náð sér að fullu af „höfuð-hálsáverkum“  þeim sem hann varð fyrir í leik ÍBV og Hauka sl. fimmtudag 2. maí.  Þorgeir heldur því fram að Heimir Óli hafi fengið mikla verki og hreyfiskerðingu upp í háls og hluta höfuðs/kjálka en vegna afburða sjúkraþjálfara og sjúkrateymis hafi Heimir Óli náð þeim árangri að verða algjörlega einkennalaus 3 dögum síðar.

Einhverra hluta vegna ákveður Þorgeir síðan að nefna alveg uppúr þurru að fyrir rúmi ári hafi Daníel Þór Ingason verði hvíldur í viku eftir þungt högg á kjálkann í leik í Vestmannaeyjum og einhverra hluta vegna tengist það því að Daníel hafi verið tekinn út úr leik 2 gegn Stjörnunni nú fyrir nokkrum vikum.  ÍBV áttar sig ekki á tengingunni en Þorgeir, Daníel Þór stóð upp í leiknum í fyrra og kom inná 2 mínútum síðar og spilaði allan tímann sem eftir var.  Gott ef hann skoraði ekki 3 mörk eftir þetta.  Það var síðan vikufrí hjá Haukum eftir þetta vegna Evrópukeppni ÍBV þannig að það var vikufrí hjá öllum leikmönnum Hauka og auðvitað Daníel líka.  En hvers vegna Þorgeir, nefndir þú ekki í þessu sambandi að fyrir nokkrum vikum braut Ásgeir Örn Hallgrímsson þannig á ungum leikmanni ÍBV, Daníel Griffin að hann fékk heilahristing og var fluttur á sjúkrahús.  Í kjölfarið gat okkar Daníel ekki æft eða spilað með ÍBV í 2-3 vikur.  Þetta vissir þú Þorgeir,  en kaust að nefna ekki.

ÍBV hefur ekki gert annað í þessu máli en að benda á staðreyndir og í því sambandi svaraðu því þá Þorgeir:  Verðskuldaði Heimir Óli ekki rautt spjald fyrir að ráðast að fyrrabragði á Kára Kristján og taka hann tökum, eftir að Kári Kristján hafði stöðvað hraðaupphlaup Hauka?  Hvers vegna var þessu augljósa rauða spjaldi sleppt og hvers vegna benti stjórn HSÍ aganefndinni ekki á það brot, en þú ert öllum hnútum kunnugur þar innandyra?

ÍBV bendir enn og aftur á að skv. myndböndum þá tók Heimir Óli, Kára Kristján niður en ekki öfugt.  Þá bendir ÍBV á þá staðreynd að Heimir Óli meiddist ekki og afleiðingarnar voru engar fyrir Hauka.  Ef því er að þakka afburða sjúkraþjálfara og sjúkrateymi Hauka, þá er það bara þannig.  Það breytir ekki staðreyndum.  Og getur þú, Þorgeir staðfest þau orð Heimis Óla að upplýsingar til dómara leiksins, að Heimir Óli væri mjög mikið meiddur og afleiðingarnar mjög miklar, hafi ekki komið frá Haukum?  Hvaðan heldur þú þá að þessar upplýsingar hafi komið?  Fór t.d. Heimir Óli á sjúkrahús eða bráðadeild og að þessar upplýsingar séu hugsanlega úr sjúkraskrám hans?

ÍBV hefur ekki orðið vart við að eiga sér málsvara í „seinni bylgjunni“.  Það gerðist a.m.k. ekki þegar að Logi Geirsson, sem þú hrósar reyndar einum málsvara í grein þinni, dæmdi í máli Kára Kristjáns þrátt fyrir að hafa séð myndbandið frá sjónarhorninu sem ÍBV hefur ítrekað bent á.  Sá dómur var harður og rangur en ekki kvartaðir þú þá Þorgeir.  Þú útskýrir það kannski betur við hvað þú átt Þorgeir með málsvara ÍBV í „seinni bylgjunni“ þannig að það sé ekki bara aðdróttanir og allir liggi undir grun vegna ódæðisins.

ÍBV hefur ekki staðið á neinn hátt að rætinni umræðu en stendur við allt það sem það hefur látið frá sér.  ÍBV hefur verið beitt órétti og það er alltaf að koma betur og betur í ljós.  Þú segir að lokum að þið hafið ekki getað borið hönd fyrir höfuð ykkar og því verið knúnir til að rita yfirlýsingu ykkar.  Málið er Þorgeir, þið þurftuð ekki að bera hönd fyrir höfuð ykkar.  Aganefnd HSÍ sá um það og þið sögðuð ekki orð, þrátt fyrir að vita að meiðsli og afleiðingar Heimis Óla voru lítil sem engin.  Ákvörðun aganefndar HSÍ var ekki tekin fyrr en 2 dögum eftir leikinn umtalaða.  En þú þagðir. Talaðu svo meira um þroskaða og máefnalega umræðu.

F.h. Handknattleiksdeildar ÍBV

Davíð Þór Óskarsson, formaður