Veru­lega farið að hvessa á Vest­fjarða­miðum

Varðskipið Þór er staðsett í Ísafjarðardjúpi og til taks ef á þarf að halda en skipið hefur sinnt eftirliti á hafsvæðinu umhverfis landið undanfarna daga.

Þetta kemur fram í tilkynningu frá Landhelgisgæslunni. Þar segir að þyrlur séu sömuleiðis til taks í Reykjavík. Eins og gefur að skilja er lítil skipaumferð á Vestfjörðum.

„Fjögur skip eru undir Grænuhlíð og eitt tankskip er á leið fyrir Hornbjarg og fer suður með Vestfjörðum. Engin skipaumferð er á miðunum norður af landinu en stjórnstöð Landhelgisgæslunnar fylgist vel með skipaumferð umhverfis landið allt.

Meðfylgjandi myndbönd voru tekin af áhöfn varðskipsins Þórs snemma í morgun þegar skipið var út af Dýrafirði. Eins og sjá má var þá farið að hvessa hressilega á Vestfjarðamiðum og gekk sjórinn yfir varðskipið,“ segir í tilkynningunni.