Starfsfólk VÍS fer fyrr heim á föstudögum frá og með 1. nóvember

Starfsfólk tryggingafélagsins VÍS hættir 45 mínútum fyrr í vinnunni á föstudögum. Þetta er niðurstaða samkomulags forsvarsmanna fyrirtækisins við starfsfólk sitt. Um er að ræða viðbrögð við kjarasamningum VR um styttingu vinnuvikunnar frá 1. janúar 2020 um níu mínútur á dag án skerðingar launa. Breytingarnar hjá VÍS taka þó gildi tveimur mánuðum fyrr eða 1. nóvember.

Samhliða verður gerð breyting á þjónustutíma á skrifstofu VÍS á föstudögum sem verður framvegis til kl. 15.30. Í tilkynningu er minnt á sólarhringsþjónustu á Mitt VÍS.

„VÍS er eftirsóknarverður vinnustaður þar sem starfsfólk hefur tækifæri til að vaxa og þróast í starfi. Mikilvægur þáttur í góðu vinnuumhverfi er að skapa jafnvægi milli vinnu og einkalífs. Við höfum nú tekið mikilvægt skref í þá átt með því að stytta vinnuvikuna strax um næstu mánaðarmót. Við erum sannfærð um að þetta góða framtak aðila á vinnumarkaði geri vinnustaðinn okkar enn fjölskylduvænni. Við erum stolt af því stíga skrefið núna enda ekki eftir neinu að bíða,“ segir Helgi Bjarnason forstjóri.

Um 200 manns starfa hjá VÍS.