Samtök atvinnulífsins leggja áherslu á sátt í samfélaginu á afmælisári

Formaður Samtaka atvinnulífsins segir svigrúm til óábyrgra kjarasamninga minna nú en áður og launin dugi betur en nokkru sinni fyrr enda hafi verið lögð áhersla á að hækka lægstu laun á undanförnum árum. Forsætisráðherra lýsti eftir konum í forystu samtaka, fyrirtækja og stofnana á aðalfundi Samtaka atvinnulífsins í dag.

Samtök atvinnulífsins sem stofnuð voru upp úr ýmsum samtökum þeirra fagna tuttugu ára afmæli sínu um þessar mundir. Á aðalfundi samtakanna í dag voru þjóðarsáttarsamningarnir árið 1990 rifjaðir upp og hvernig þeir hefðu lagt grunninn að nýrri nálgun við samningaborð atvinnurekenda, verkalýðshreyfingar og stjórnvalda allt síðan þá.

„Svigrúm til óábyrgra kjarasamninga er minna en áður. Launin duga betur en nokkru sinni fyrr og almenn velmegun og jöfnuður hefur aldrei verið meiri,“ sagði Eyjólfur Árni Rafnsson formaður SA meðal annars í ávarpi sínu.

Áberandi var í ræðu formannsins að samtökin leggja nú áherslu á félagslegan jöfnuð samfara launahækkunum sem tryggi hækkun lægstu launa sem fyrirtækin treysti sér til að standa undir. Þá sé mikilvægt að stöðugleiki ríki í stjórnmálum eftir þrennar kosningar á árunum 2013 til 2017. Myndun núverandi ríkisstjórnar hafi verið góð niðurstaða eftir þá orrahríð sem á undan fór.

„Lærdómurinn er að hægt er að hægt er að brúa bil milli skoðana þótt langt virðist á milli. Ekki er hefð fyrir því að hægri og vinstri flokkar vinni saman hér á landi. Enginn vafi er á því í mínum huga að vel hefur tekist til um þetta samstarf og víst er að stuðningur ríkisstjórnarinnar við lífskjarasamninginn skipti miklu máli á liðnu vori,“ sagði Eyjólfur Árni.

Katrín Jakobsdóttir forsætisráðherra tók undir með formanni SA að sátt og traust milli aðila væri grundvöllurinn að því að ná árangri í að auka jöfnuð í samfélaginu sem kæmi öllum til góða. Það gengi hins vegar hægt að sátt og jöfnuður skiluðu sér til innflytjenda sem gætu skilað mun meiru til samfélagsins fengju þeir að njóta sín. Svo vísaði Katrín til afmælisbókar Samtaka atinnulífsins þar sem væri listi yfir alla forystukarla samtakanna og fáar myndir af konum.

„Og ég ætla að segja ykkur það sem móðir þriggja drengja og umkringd körlum alla daga; mér finnst karlmenn algerlega frábærir, ekki halda neitt annað, en þeir eru ekki svona miklu frábærari en konur,“ sagði Katrín og uppskar dúndrandi lófaklapp viðstaddra í Eldingarsal Hörpu.

Undir þessi sjónarmið tók síðan Halldór Benjamín Þorbergsson framkvæmdastjóri SA síðar á fundinum.