Vandræðalaust hjá Fram í Mosfellsbæ

Fram lenti í engum vandræðum með Aftureldingu er liðin mættust í Olís-deild kvenna í handbolta í dag.

Framstúlkur unnu tólf marka sigur, 27-15, eftir að hafa verið sex mörkum yfir er liðin gengu til búningsherbergja, 13-7.

Markaskorið dreifðist vel hjá Fram. Þórey Rósa Stefánsdóttir og Karen Knútsdóttir gerðu fimm mörk hvor en Hildur Þorgeirsdóttir gerði fjögur.

Anamaria Gugic var markahæst í liði Aftureldingar með átta mörk en Roberta Ivanauskaite kom næst með þrjú mörk.

Fram er með sex stig á toppi deildarinnar en Afturelding er á botninum án stiga.