Guardiola: Slæmur dagur hjá City

Pep Guardiola sagði Manchester City ekki hafa átt sinn besta dag í dag, en liðið tapaði fyrir Úlfunum í ensku úrvalsdeildinni.

„Við byrjuðum vel, við vildum vera þolinmóðir með okkar leik því við vitum hversu vel þeir verjast,“ sagði Guardiola eftir leikinn.

Úlfarnir unnu 2-0 sigur en bæði mörkin komu seint í seinni hálfleik.

„Við leyfðum þeim að hlaupa á okkur, urðum stressaðir og við náðum ekki að skapa okkur færi. Þetta var slæmur dagur.“

„Þeir spila á löngum boltum og verjast, fara svo í skyndisóknir. Þetta er líkamlega sterkt lið og við vitum hverjir styrkleikar þeirra eru. Við vorum ekki nógu skipulagðir og töpuðum boltanum á stöðum þar sem við megum ekki tapa honum.“

„Við munum reyna að koma til baka.“

Manchester City er nú átta stigum á eftir Liverpool á toppi deildarinnar og aðeins stigi á undan Arsenal í þriðja sætinu.