Kæri stúdent

Kæri stúdent.

Velkomin í Háskóla Íslands, nýnemar sem og eldri nemendur. Um þessar mundir eru mörg þúsund stúdentar að hefja nám innan veggja skólans og þetta er svo sannarlega tíminn til þess að virkja heilasellurnar aftur eftir langt og vonandi gott sumarfrí.

En skólinn snýst ekki bara um að virkja heilasellur og læra, innan veggja hans eru nefnilega alls kyns möguleikar í boði fyrir utan námið þitt. Þegar ég byrjaði í Háskóla Íslands ákvað ég að fara í Vöku af því að ég sá tækifæri til þess að kynnast fólki þvert á svið háskólans. Einnig fann ég að þarna gat ég viðrað mínar skoðanir og nýtt krafta mína í að bæta hag stúdenta innan Háskóla Íslands.

Hvað er Vaka og af hverju er ég í Vöku? Skemmtilegt að þú sért að velta því fyrir þér. Vaka er hagsmunafélag stúdenta innan Háskóla Íslands og hefur barist fyrir bættum hag stúdenta síðan 2. febrúar 1935. Í Vöku er án alls efa, duglegasta og skemmtilegasta fólk sem ég þekki. Síðan skemmmir það ekki fyrir að félagslífið innan hreyfingarinnar er frábært og vökupartýin standa alltaf fyrir sínu. Sjaldan á mínum tuttugu og tveimur árum á þessari jörð hef ég kynnst jafn kraftmiklu fólki sem tilbúið er að berjast fyrir bættum hag stúdenta.

Þverpólitísk hagsmunabarátta er nauðsynleg. Í Vöku sameinast stúdentar allstaðar af hinum pólitíska ás og bera saman bækur sínar. Að tengja landspólitík við hagsmunabaráttu stúdenta er gamall brandari sem er eiginlega hættur að vera fyndinn. Það er mikilvægt að aðilar sem tala fyrir jafnstóran hóp og stúdenta innan Háskóla Íslands geti aðskilið sig frá hinni eða  þessari stefnu. Hlutleysi gagnvart stjórnvöldum er mikilvægt til þess að geta verið raunveruleg og sameinuð rödd stúdenta. Ef við vinnum öll saman að bættum hag stúdenta, burtséð frá því hvort við viljum staðsetja okkur á vinstri, miðju eða hægri hlið stjórnmála, verður hagsmunabaráttan svo mikið betri, skemmtilegri og árangursríkari. Hagsmunabarátta stúdenta innan Háskóla Íslands snýst um það að ólíkar raddir komi saman við sama borð og vinni að sameiginlegum markmiðum. Það munt þú finna innan Vöku.

Hlutir sem við teljum sjálfsagða í dag, eins og Hámu, prófabanka, Stúdentakjallarann og stúdentagarðana hefðu aldrei orðið til nema fyrir tilstilli hagsmunabaráttu Vöku. Vaka hefur alla tíð barist hart fyrir bættum hag stúdenta, gerir það enn í dag og mun halda því áfram um ókomna framtíð.

Ég er í Vöku af því að þar er að finna raunverulega hagsmunabaráttu stúdenta. Þar er að finna hagsmunabaráttu þar sem allar skoðanir eru velkomnar. Innan raða Vöku finnur þú fólk sem vinnur óeigingjarnt starf í þágu stúdenta innan Háskóla Íslands.  

Hafðu áhrif og vertu með!

Höfundur greinarinnar er formaður Vöku og situr í stúdentaráði.