Innlent

Man vel eftir McAfee en þó ekki John

Kolbeinn Tumi Daðason skrifar
Hjónin hafa rekið veitingastaðinn frá árinu 2012.
Hjónin hafa rekið veitingastaðinn frá árinu 2012. Gregorz
Gregorz Tomasz Maniakowski vaknaði við símtal í morgun og spurður út í fregnir af milljarðarmæringnum John McAfee sem virðist mögulega hafa farið huldu höfði á Dalvík í sumar. Ekki nóg með það heldur sagðist vírusvarnafrömuðurinn sérstaklega eiga eftir að sakna veitingastaðsins Gregors sem Gregorz rekur ásamt konu sinni.

„Ég veit ekki hvenær hann kom, ef hann kom. Ef ég spjallaði við hann þá er ég búinn að gleyma því,“ segir Gregorz í samtali við Vísi. Hann segir marga sækja heim veitingastaðinn sem hann rekur ásamt eiginkonu sinni á Dalvík og hefur gert síðan árið 2012.

„Það eru margir sem koma og vilja spjalla. En ég man ekki eftir því að neinn hafi sagst heita John eða svoleiðis.“

Hann útskýrir fyrir blaðamanni Vísis að blaðamaður annars miðils hafi hringt í morgun og vakið hann. Gregorz hafi komið af fjöllum, opnað tölvu sína og við hafi blasað fregnir af McAfee og veitingastaðnum.

Sveitarstjóri í Dalvíkurbyggð segist ekki hafa séð McAfee í sumar og hafi hún þó verið heima í allt sumar og sjái umrætt hús út um gluggann á bæjarskrifstofunni.

Engin staðfesting hefur fengist á veru McAfee á Dalvík en hann segist sjálfur hafa verið hér á landi og ber veitingastaðnum vel söguna.

Milljarðamæringur á flótta

Tæknifrumkvöðullinn John McAfee, sem er hvað þekktastur fyrir að hafa stofnað McAfee vírusvarnarfyrirtækið, hefur verið á flótta frá 2012 þegar hann var sakaður um að hafa skotið nágranna sinn í Belís til bana. Hann er einnig sakaður um umfangsmikil skattsvik í Bandaríkjunum.

McAfee hvarf af sjónarsviðinu í sumar eftir að hann var handtekinn í Dóminíska lýðveldinu. Þá var hann ásamt öðrum á ferð í snekkju og fundust þar um borð skotvopn, skotfæri og „hergögn“. Eftir að honum var sleppt sagði McAfee á Twitter að hann ætlaði sér að fara huldu höfði um tíma og sagðist hann vera í Litháen.

Nú á dögunum kom þó í ljós að McAfee hafi þurft að flytja á nýjan leik og sagði hann á Twitter að það væri vegna þess komið hafi verið upp um felustað hans og eiginkonu hans.

McAfee hvarf af sjónarsviðinu í sumar eftir að hann var handtekinn í Dóminíska lýðveldinu.Getty/Larry Marano

Auglýsa aldrei

Gregorz hefur verið búsettur hér á landi í 24 ár og talar prýðilega íslensku. Aðspurður hvað sé best við veitingastað þeirra hjóna segir það ekki hans að lofsyngja eigin stað. Aðrir verði að tjá sig um hann.

„Ég hugsa samt að þetta sé góður staður. Við auglýsum aldrei en fólk kemur alltaf og vill spjalla. Ég vil vera góður vinur,“ segir Gregorz.

Þau konan standi vaktina og stundum taki dóttir þeirra til hendinni.

„Þetta er lítill staður með lítinn en góðan matseðil, í rólegum bæ. Fyrir utan á Fiskidaginn.“

McAfee í gömlu Windows tölvunni

Adam nokkur Guerbuez virðist hafa komið upp um John McAfee á Twitter þann 26. ágúst. Hann fullyrðir að McAfee hafi haldið til í íbúð á efri hæð hússins. Gregorz þekkir ekki til þess. 

„Ég er ekki eigandi hússins, það er annað fólk sem á húsið,“ segir Gregorz. Eftir því sem hann viti best séu íbúðirnar í langtímaleigu, ekkert Airbnb eða þess háttar. Tvær fjölskyldur búi í íbúðunum og hafi gert í nokkurn tíma.

Hann rifjar upp kynni sín af McAfee fyrir mörgum árum.

„Í gamla daga opnaði maður Windows tölvuna sína og þá kom upp antívírus McAfee,“ segir Gregorz og hlær.

Ef marka má orð McAfee á Twitter eru hann og fjölskylda hans á bak og burt frá Dalvík.

Í fyrstu bölvaði hann Adam Guerbuez fyrir að hafa komið upp um þau en dró svo í land. Til þeirra hefði spurst fyrr en síðar. Það hafi verið hans mistök að lofsyngja Gregors veitingastaðinn.

Katrín Sigurjónsdóttir er sveitarstjóri Dalvíkurbyggðar.

Sveitastjóri kemur af fjöllum

Svo því sé haldið rækilega til haga hefur ekki fengist staðfesting á því hvort McAfee hafi haldið til hér á landi eða ekki. Katrín Sigurjónsdóttir, sveitarstjóri Dalvíkurbyggðar, kom sömuleiðis af fjöllum þegar blaðamaður heyrði í henni hljóðið um ellefuleytið.

Katrín hafði hvorki séð fréttir né kannaðist hún við andlitið á McAfee.

„Ég hef verið heima í allt sumar en ég hef ekki séð þennan mann,“ segir Katrín.

Hún þekkir vel til fólksins sem á umrætt hús og viti vel hverjir leigi íbúðirnar tvær á efri hæðinni. Einhverjar framkvæmdir hafi verið í risinu en hún hafi ekki orðið vör við fyrrnefndan McAfee.

„En það er gaman fyrir Dalvíkinga að komast í fréttirnar,“ segir Katrín og hlær.

Fréttin var uppfærð með viðbrögðum sveitarstjóra.


Tengdar fréttir

Vírusakóngur vill í Hvíta húsið

Vírusvarnafrömuðurinn John McAfee tilkynnti í gær um framboð sitt fyrir hönd nýstofnaðs flokks síns, Netflokksins, til forseta Bandaríkjanna. McAfee fann upp fyrsta vírusvarnaforritið.

John McAfee fluttur á sjúkrahús

Auðkýfingurinn og hugbúnaðarfrumkvöðullinn John McAfee var fluttur á sjúkrahús í Guatemala í dag. McAfee, sem var eftirlýstur af Interpol vegna morðs í Belís, sótti um pólitísk hæli í Guatemala á dögunum.




Fleiri fréttir

Sjá meira


×